Shixenzidin béyjinggha biwasite qatnaydighan yéngi hawa yoli liniyesi échilidiken

Muxbirimiz qutlan
2016.07.18

Uyghur élidin xitay paytexti béyjing we bashqa xitay ölke, sheherlirige qatnaydighan hawa yoli liniyelirining téz sür'ette köpeytilishi közetküchiler bilen xelq'aradiki siyasiy analizchilarning diqqitini qozghimaqta.

Xelq tori Uyghurche qanilining xewirige qarighanda, Uyghur élidiki ishlepchiqirish-qurulush armiyesining merkizi shehiri hésablan'ghan shixenzidin béyjinggha uchidighan yéngi hawa yoli liniyesi 7-ayning 21-küni resmiy qatnash bashlaydiken.

Shixenze shehiridin béyjinggha biwasite qatnaydighan hawa yoli liniyesi échish axbarat élan qilish yighini 15-iyul küni shixenze shehiride ötküzülgen. Igilinishiche, mezkur yéngi hawa yoli liniyesi échilghan deslepki mezgilde, ayropilan bélitining bahasida alahide étibar qilinidiken.

Melum bolushiche, xitay merkiziy hökümiti yéqinqi yillardin buyan Uyghur élidiki ishlepchiqirish-qurulush armiyesige salidighan iqtisadiy sélinmisini hessilep köpeytken bolup, hetta bezi türlerde bingtüen'ge bérilidighan iqtisadiy meblegh Uyghur aptonom rayoningkige tengleshken hetta uningdinmu éship ketken. Xitay kompartiyesi merkiziy komitéti nahiyiti éniq qilip “Shinjang ishlepchiqirish-qurulush bingtüeni junggoning gherbiy chégrasini qoghdash hemde shinjangning uzaq mezgillik muqimliqini saqlashtiki eng ishenchilik tayanch küch” dep körsetken.

Közetküchiler, shixenze we Uyghur élidiki bingtu'en'ge qarashliq bashqa sheherlerdin xitay ölke, sheherlirige biwasite qatnaydighan yéngi hawa yolliri bilen poyiz liniyelirining échilishi, xitayning Uyghur aptonom rayonigha qaratqan istratégiyelik pilanlirining bir qismi, dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.