“Tamashibin” tor zhurnili: “Xitay jem'iyiti téz sür'ette herbiyleshmekte!”

Washin'gtondin muxbirimiz erkin teyyarlidi
2024.05.13

En'giliyediki “Tamashibin” namliq tor zhurnili 12-may küni élan qilghan bir maqalida, xitayning téz sür'ette herbiylishishke qarap kétiwatqanliqini ilgiri sürgen.

En'giliyelik zhurnalist, “Ejdiha oti: xitayning yéngi soghuq urushi” namliq kitabning aptori iyan wilyamas imzasidiki maqalida qeyt qilinishiche, shi jinping gherbke qarshi urushwazliq chaqiriqlirini kücheytken, bixeterlik mesililirige “Meptun” bolghan halda ish körüp, xitay maliye sistémisini saghlamlashturush we iqtisadni herbiyleshtürüshke urunuwatqan bolsimu, emma bu xil téz sür'ettiki herbiylishishning kimni nishan qilghanliqi so'al peyda qilmaqta iken.

Maqalida xitay hökümet taratqulirining “Yéngi dewridiki ilghar dölet mudapi'e” teshwiqatini keng xewer qiliwatqanliqi, shu arqiliq mektep oqughuchilirigha “Intizamchanliq”, “Japaliq ishlesh we wetenperwerlik rohini ‍urghutush” terbiyesini singdürüwatqanliqi ilgiri sürülidu. Emma buning arqisida maw zédong dewridin béri körülüp baqmighan xitay jem'iyitini herbiyleshtürüshke élip mangghan bir qanunning yatqanliqini eskertidu.

Melum bolushiche, xitay xelq qurultiyi yéqinda xitayning “Dölet mudapi'e terbiyesi qanuni” gha tüzitish kirgüzüp, herbiy meshiqni 12 yashtin 15 yashqiche bolghan toluqsiz ottura mektep oqughuchilirigha kéngeytken. Maqalide qeyt qilinishiche, resmiyet xaraktérlik herbiy meshiq xitaydiki mektep we aliy bilim yurtlirida binormal ehwal bolmisimu, biraq hazir bu xil herbiy meshiq oqughuchilar we ata-anilar teripidin anche qarshi élinmay kelmekte iken.

Maqalida “Dölet mudapi'e terbiyesi qanuni” gha xitayda bixeterlik mesilisige bolghan “Meptunluq” xizmet orunlirigha hem mehellilerge kéngeygen bir waqitta tüzitish kirgüzülgenliki, shi jinping gherbke qarshi urush chaqiriqlarda bolup kéliwatqan bolsimu, emma uning oxshash bir waqitta ichki bixeterlik mesililirigimu meptun boluwatqanliqi tekitlen'gen. Maqalida qeyt qilinishiche, “Melum nuqtidin hazir shi jinpinggha hemme terepning düshmen körünüwatqanliqi, uning gumanxorluq késili maw zédong dewrining zulmetlik künliridin béri körülüp baqmighan shekilde mektep we zawutlargha kéngeygenliki éniq” iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.