Лагерлар мәсилиси һиндонезийәдики өктичиләрниң сиясий қоралиға айланған

Лагерлар мәсилиси һиндонезийәдики өктичиләрниң бу йил 4‏-айда өткүзүлидиған сайламда президент җоко видодоға һуҗум қилидиған сиясий козерға айланған.

Америка “ташқи сиясәт” журнилиниң хәвиридә көрситилишичә, нөвәттә сайламға қатнишиватқан исламчи сиясийонлар вә паалийәтчиләр президент җоко видодо һөкүмитиниң уйғур мусулманлириниң бастурулушиға сүкүт қилишини униң мусулмандарчилиқиниң күчлүк әмәслики, етник келип чиқишиниң хитай болуши яки йошурун коммунист болуши мумкинликигә бағлимақта икән.

Өткән йили декабирда нәччә йүзлигән һиндонезийәлик мусулман хитайниң җакартадики әлчиханиси алдида намайиш қилип, хитайниң уйғурларни кәң көләмлик йиғивелиш лагерлириға қамиғанлиқиға наразилиқ билдүргән иди. “ташқи сиясәт” журнилиниң хәвиридә қәйт қилинишичә, шу қетимқи намайишта мусулман гуруппилар “2019‏-йили президентни алмаштурайли” дегән лозункиларни көтүрүп чиққан. Мақалидә йәнә һиндонезийә өктичилириниң намзати прабово субиантониң баянатчиси ираван ронодипурониң сөзи нәқил кәлтүрүлгән болуп, у “һиндонезийә аһалисиниң мутләқ көп қисми мусулман болуш сүпити билән бу хил инсаний трагедийәләрни һәл қилишта өзиниң күчини көрситиши керәк” дегән. Униң илгири сүрүшичә, президентниң уйғур мәсилисигә сүкүт қилиши “хитайниң җоковини гөрүгә еливалғанлиқи” ни испатлайдикән.

Һиндонезийә пәләстин вә роһеңга мәсилилиридә изчил мусулманларни қоллап кәлгән болсиму, лекин униң уйғурларға кәлгәндә сүкүт қилиши һиндонезийәдики мусулман партийә-гуруһлар вә җамаәтләрниң әйиблишигә учриған иди. Өткәндә һиндонезийә өлималар кеңиши президент видодони уйғур мәсилисигә арилишишқа чақирған иди. Лекин мақалидә илгири сүрүшичә, һиндонезийәдә уйғурларни қоллаватқан мусулман гуруппилар бар болуп, кишилик һоқуқ тәшкилатлири уйғурларни қоллаштин еһтият қилидикән. Хәвәрдә уларниң бу һиндонезийәдә хитайларға қарши етник өчмәнликни қайта қозғиветиши мумкин дәп әндишә қилидиғанлиқини билдүргән.