Lagérlar mesilisi hindonéziyediki öktichilerning siyasiy qoraligha aylan'ghan

Muxbirimiz erkin
2019-02-08
Élxet
Pikir
Share
Print

Lagérlar mesilisi hindonéziyediki öktichilerning bu yil 4‏-ayda ötküzülidighan saylamda prézidént joko widodogha hujum qilidighan siyasiy kozérgha aylan'ghan.

Amérika "Tashqi siyaset" zhurnilining xewiride körsitilishiche, nöwette saylamgha qatnishiwatqan islamchi siyasiyonlar we pa'aliyetchiler prézidént joko widodo hökümitining Uyghur musulmanlirining basturulushigha süküt qilishini uning musulmandarchiliqining küchlük emesliki, étnik kélip chiqishining xitay bolushi yaki yoshurun kommunist bolushi mumkinlikige baghlimaqta iken.

Ötken yili dékabirda nechche yüzligen hindonéziyelik musulman xitayning jakartadiki elchixanisi aldida namayish qilip, xitayning Uyghurlarni keng kölemlik yighiwélish lagérlirigha qamighanliqigha naraziliq bildürgen idi. "Tashqi siyaset" zhurnilining xewiride qeyt qilinishiche, shu qétimqi namayishta musulman guruppilar "2019‏-Yili prézidéntni almashturayli" dégen lozunkilarni kötürüp chiqqan. Maqalide yene hindonéziye öktichilirining namzati prabowo subi'antoning bayanatchisi irawan ronodipuroning sözi neqil keltürülgen bolup, u "Hindonéziye ahalisining mutleq köp qismi musulman bolush süpiti bilen bu xil insaniy tragédiyelerni hel qilishta özining küchini körsitishi kérek" dégen. Uning ilgiri sürüshiche, prézidéntning Uyghur mesilisige süküt qilishi "Xitayning jokowini görüge éliwalghanliqi" ni ispatlaydiken.

Hindonéziye pelestin we rohéngga mesililiride izchil musulmanlarni qollap kelgen bolsimu, lékin uning Uyghurlargha kelgende süküt qilishi hindonéziyediki musulman partiye-guruhlar we jama'etlerning eyiblishige uchrighan idi. Ötkende hindonéziye ölimalar kéngishi prézidént widodoni Uyghur mesilisige arilishishqa chaqirghan idi. Lékin maqalide ilgiri sürüshiche, hindonéziyede Uyghurlarni qollawatqan musulman guruppilar bar bolup, kishilik hoquq teshkilatliri Uyghurlarni qollashtin éhtiyat qilidiken. Xewerde ularning bu hindonéziyede xitaylargha qarshi étnik öchmenlikni qayta qozghiwétishi mumkin dep endishe qilidighanliqini bildürgen.

Toluq bet