Hindonéziyediki uniwérsitét mudirliri Uyghurlar heqqide birleshme bayanat élan qildi

Muxbirimiz irade
2018-12-27
Élxet
Pikir
Share
Print

Hindonéziyediki "Jumhuriyet xewerliri" torining xewirige qarighanda, hindonéziyediki bir qanche uniwérsitétlar bügün birleshme bayanat élan qilip, hindonéziye hökümitini we dunyadiki herqaysi organlarni Uyghur élide musteqil tekshürüsh élip bérishqa chaqirghan.

Hindonéziyening yogyakarta shehiridiki 5 islam uniwérsitéti mudirlirining imzasi bilen élan qilin'ghan bu birleshme bayanat bügün hindonéziye tashqi ishlar ministirliqigha we birleshken döletler teshkilatining jakartadiki ishxanisigha yetküzüp bérilgen.

Mezkur bayanatta Uyghur élide musteqil tekshürüsh élip bérishni telep qilish, muhajirette panahliniwatqan Uyghur musulmanlirigha yardem qilish qatarliq mezmunlar orun alghan iken.

"Jakarta pochtisi" gézitining xewer qilishiche, bügün yene hindonéziyediki ölimalar kéngishi bayanat élan qilip, özlirining Uyghur élini ziyaret qilish we u yerdiki weziyetni biwasite tekshürüsh arzusini bildürgen.

Hindonéziye ölimalar kéngishi meslihetchiler komitétining re'isi 17‏-dékabir bayanat élan qilip, xitayning Uyghurlarni basturushini qattiq tenqid qilghan idi.

Hindonéziye ölimalar kéngishi hindonéziye musulmanlirigha petiwa béridighan eng yuqiri diniy orginidur. U islam ellirining ichide xitayning Uyghurlarni basturushini ashkara tenqid qilghan hökümetke chétishliq tunji islamiy gewdidur. Xitayning 800 mingdin 2 milyon'ghiche Uyghurni yighiwélish lagérlirigha qamap, ularning milliy medeniyiti we diniy étiqadini cheklishi gherb dunyasining qattiq tenqidige uchrighan bolsimu, emma hindonéziyedin bashqa köpligen musulman döletliri hazirgha qeder buninggha süküt qilip kelmekte.

Toluq bet