Hikvision Ширкити уйғур елидики тохтамлирини бикар қилди

Вашингтондин мухбиримиз шадийә тәйярлиди
2024.12.16

“җәнубий хитай әтигәнлик почтиси” гезитиниң хәвәр қилишичә, 2019-йили трамп һөкүмити җаза елан қилған Hikvision (хәйкаң) ширкити сабиқ пирезидент доналд трамп иккинчи қетим вәзипә өтәшкә тәйярлиқ қиливатқанда уйғур елидики йәрлик һөкүмәт тармақлири билән имзалиған бәш түрлүк тохтамни бикар қилған.

14-Декабирдики хәвәрдә ейтилишичә, мәзкур ширкәт уйғур елидики тармақ ширкәтләр билән түзгән тохтамни бикар қилған болсиму, буниңдики сәвәбләр тоғрисида сөз қилмиған. Хәвәрдә Hikvision ширкити америка билән хитай оттурисидики күнсери кәскинлишиватқан техника урушида қармаққа елинған хитай техника ширкәтлириниң бири дәп көрситилгән. Хәвәрдә мундақ дейилгән: “HIKvisionширкитиниң ейтишичә, 2017-йили райондики йәрлик һөкүмәт билән келишим имзалиған бу ширкәт районда буниңдин кейин башқа сода паалийәтлири билән шуғулланмайду.”

Хәвәрдә, Hikvision ширкитиниң уйғур елидики үрүмчи, лопнур, қарақаш, гума вә керийә қатарлиқ җайлардики бәш електирон техника ширкити билән бирликтә 2023-йили 3-айда америка сода министирлиқиниң “қара тизимлики” гә киргүзүлгәнлики тилға елинған.

Хәвәрдә ейтилишичә, америка санаәт вә бихәтәрлик идариси Hikvision (хәйкаң) ширкитини “хитай һөкүмитиниң зор көләмлик тутқун вә бастуруш һәрикәтлиригә, җүмлидин шинҗаңдики уйғур вә башқа мусулман аз санлиқ милләтләрни юқири пән-техника арқилиқ назарәт қилиштәк кишилик һоқуқ дәпсәндичиликигә ярдәмләшкән” дәп әйиблигән.

Hikvision (Хәйкаң) ширкити 2017-йилдин тартип лагерларға қамалған уйғурларни назарәт қилишта ишлитилгәнлики үчүн америка 2019-йили униңға җаза елан қилған иди. 2021-Йил әнглийә һөкүмити һөкүмәт биналирида Hikvision камералирини ишлитишни чәклигән, явропа иттипақиму уни парламент бинасидин чиқирип ташлиғаниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.