Hikvision Shirkiti Uyghur élidiki toxtamlirini bikar qildi

“Jenubiy xitay etigenlik pochtisi” gézitining xewer qilishiche, 2019-yili tramp hökümiti jaza élan qilghan Hikvision (xeykang) shirkiti sabiq pirézidént donald tramp ikkinchi qétim wezipe öteshke teyyarliq qiliwatqanda Uyghur élidiki yerlik hökümet tarmaqliri bilen imzalighan besh türlük toxtamni bikar qilghan.

14-Dékabirdiki xewerde éytilishiche, mezkur shirket Uyghur élidiki tarmaq shirketler bilen tüzgen toxtamni bikar qilghan bolsimu, buningdiki sewebler toghrisida söz qilmighan. Xewerde Hikvision shirkiti amérika bilen xitay otturisidiki künséri keskinlishiwatqan téxnika urushida qarmaqqa élin'ghan xitay téxnika shirketlirining biri dep körsitilgen. Xewerde mundaq déyilgen: “HIKvisionShirkitining éytishiche, 2017-yili rayondiki yerlik hökümet bilen kélishim imzalighan bu shirket rayonda buningdin kéyin bashqa soda pa'aliyetliri bilen shughullanmaydu.”

Xewerde, Hikvision shirkitining Uyghur élidiki ürümchi, lopnur, qaraqash, guma we kériye qatarliq jaylardiki besh éléktiron téxnika shirkiti bilen birlikte 2023-yili 3-ayda amérika soda ministirliqining “Qara tizimliki” ge kirgüzülgenliki tilgha élin'ghan.

Xewerde éytilishiche, amérika sana'et we bixeterlik idarisi Hikvision (xeykang) shirkitini “Xitay hökümitining zor kölemlik tutqun we basturush heriketlirige, jümlidin shinjangdiki Uyghur we bashqa musulman az sanliq milletlerni yuqiri pen-téxnika arqiliq nazaret qilishtek kishilik hoquq depsendichilikige yardemleshken” dep eyibligen.

Hikvision (Xeykang) shirkiti 2017-yildin tartip lagérlargha qamalghan Uyghurlarni nazaret qilishta ishlitilgenliki üchün amérika 2019-yili uninggha jaza élan qilghan idi. 2021-Yil en'gliye hökümiti hökümet binalirida Hikvision kaméralirini ishlitishni chekligen, yawropa ittipaqimu uni parlamént binasidin chiqirip tashlighanidi.