Америка һинди-тинч окян районидики дөләтләрни бихәтәрлик мәблиғи билән тәминләшкә вәдә қилди

Америка хитайниң асия тинч-окян районидики тәсирини кеңәйтиш урунушлириға қарита бу райондики дөләтләрни бихәтәрлик мәблиғи билән тәминләйдиғанлиқини билдүргән.

Ройтерс агентлиқиниң хәвәр қилишичә, америка ташқи ишлар министири майк помпейо өткән шәнбә күни сингапорда һинди-тинч окян районидики дөләтләрни 300 милйон долларлиқ бихәтәрлик мәблиғи билән тәминләйдиғанлиқини билдүргән. Майк помпейо америкиниң бу пиланини сингапорда өткүзүлгән “шәрқий-җәнубий асия әллири иттипақи” ниң йиғинида мухбирларға ашкарилиған. У өткән һәптә өткүзүлгән мәзкур йиғинға қанишип, шәрқий-җәнубий асия иттипақиға әза дөләтләрниң ташқи ишлар министирлири билән айрим-айрим учрашқан. 

Ройтерс агентлиқиниң хәвәр қилишичә, помпейо өткән шәнбә күни мухбирларға “һинди-тинч окян райониниң бихәтәрликини қоғдаш мәсулийитимизниң бир қисми сүпитидә америка пүткүл районниң бихәтәрлик һәмкарлиқини алға сүрүшкә 300 милйон долларға йеқин мәбләғ билән тәминләйду,” дегән. Майк помпейо буниң сәл алдида һинди-тинч окян райониниң енергийә, технологийә вә ул муәссәсә қурулушиға 113 милйон доллар ярдәм беридиғанлиқини билдүргән иди.

Анализчилар америкиниң һинди-тинч окян районидики дөләтләргә ярдәм беришни күчәйтиши хитайниң бу райондики кеңәймичиликигә тақабил турушни мәқсәт қиливатқанлиқини билдүрмәктә. Ройтерс агентлиқиниң хәвиридә қәйт қилинишичә, бу америка-хитай оттурисидики сода урушиниң җәнубий деңиз мәсилисидәк район характерлик қизиқ нуқтиларға кеңийишидин дерәк беридикән. Майк помпейо мухбирларға хитайниң җәнубий деңизни һәрбийләштүриватқанлиқиға болған әндишисини оттуриға қойғанлиқини билдүргән.

Сингапордики йиғинға хитайниң ташқи ишлар министири ваң йи қатнашқан. Ройтерс агентлиқиниң хәвиридә тәкитлишичә, ваң йи мухбирларға америкиниң җәнубий деңизға “зор истратегийилик қораллар” ни әвәткәнликини илгири сүрүп, “бу мәзкур районниң һәрбийлишишиниң арқисидики әң чоң күч” дегән. Мәлумки, хитай җәнубий деңизниң мутләқ көп қисмида өзиниң игилик һоқуқи барлиқини илгири сүрүп, бу райондики бәзи аралларға һәрбий қорал вә үскүниләрни орунлаштурған иди.