Amérika hindi-tinch okyan rayonidiki döletlerni bixeterlik meblighi bilen teminleshke wede qildi

Amérika xitayning asiya tinch-okyan rayonidiki tesirini kéngeytish urunushlirigha qarita bu rayondiki döletlerni bixeterlik meblighi bilen teminleydighanliqini bildürgen.

Roytérs agéntliqining xewer qilishiche, amérika tashqi ishlar ministiri mayk pompéyo ötken shenbe küni sin'gaporda hindi-tinch okyan rayonidiki döletlerni 300 milyon dollarliq bixeterlik meblighi bilen teminleydighanliqini bildürgen. Mayk pompéyo amérikining bu pilanini sin'gaporda ötküzülgen “Sherqiy-jenubiy asiya elliri ittipaqi” ning yighinida muxbirlargha ashkarilighan. U ötken hepte ötküzülgen mezkur yighin'gha qaniship, sherqiy-jenubiy asiya ittipaqigha eza döletlerning tashqi ishlar ministirliri bilen ayrim-ayrim uchrashqan. 

Roytérs agéntliqining xewer qilishiche, pompéyo ötken shenbe küni muxbirlargha “Hindi-tinch okyan rayonining bixeterlikini qoghdash mes'uliyitimizning bir qismi süpitide amérika pütkül rayonning bixeterlik hemkarliqini algha sürüshke 300 milyon dollargha yéqin meblegh bilen teminleydu,” dégen. Mayk pompéyo buning sel aldida hindi-tinch okyan rayonining énérgiye, téxnologiye we ul mu'essese qurulushigha 113 milyon dollar yardem béridighanliqini bildürgen idi.

Analizchilar amérikining hindi-tinch okyan rayonidiki döletlerge yardem bérishni kücheytishi xitayning bu rayondiki kéngeymichilikige taqabil turushni meqset qiliwatqanliqini bildürmekte. Roytérs agéntliqining xewiride qeyt qilinishiche, bu amérika-xitay otturisidiki soda urushining jenubiy déngiz mesilisidek rayon xaraktérlik qiziq nuqtilargha kéngiyishidin dérek béridiken. Mayk pompéyo muxbirlargha xitayning jenubiy déngizni herbiyleshtüriwatqanliqigha bolghan endishisini otturigha qoyghanliqini bildürgen.

Sin'gapordiki yighin'gha xitayning tashqi ishlar ministiri wang yi qatnashqan. Roytérs agéntliqining xewiride tekitlishiche, wang yi muxbirlargha amérikining jenubiy déngizgha “Zor istratégiyilik qorallar” ni ewetkenlikini ilgiri sürüp, “Bu mezkur rayonning herbiylishishining arqisidiki eng chong küch” dégen. Melumki, xitay jenubiy déngizning mutleq köp qismida özining igilik hoquqi barliqini ilgiri sürüp, bu rayondiki bezi arallargha herbiy qoral we üskünilerni orunlashturghan idi.