Һиндонезийә хитай белиқчи кемилириниң һиндонезийә тәвәликидә белиқ тутқанлиқини әйиблиди

Мухбиримиз меһрибан
2016-03-21
Share

Һиндонезийә һөкүмити 21 - март баянат елан қилип, һиндонезийиниң натуна деңизи тәвәликидә белиқ тутушқа киргән хитай белиқчилирини һиндонезийә хәвпсизлик күчлири агаһландурған вақитта хитайниң деңиз мудапиә әтритиниң һиндонезийә хәвпсизлик әтритиниң вәзипә иҗра қилишиға тосқунлуқ қилғанлиқиға қаттиқ наразилиқ билдүрди.

Әнгилийә б б с агентлиқиниң һиндонезийә һөкүмәт хәвәрлиридин нәқил елип хәвәр қилишичә, хитай деңиз қирғиқи муһапизәт әтритиниң һиндонезийә хәвпсизлик әтридигә қилған тосқунлуқ вәқәсидин кейин, хитайниң җакартада турушлуқ баш әлчиси һиндонезийә ташқи ишлар министирлиқиға чақиртилған. Хитай баш әлчисидин вәқәгә изаһат бериш тәләп қилғанлиқини әскәрткән һиндонезийә ташқи ишлар министири ретно марсуди баянат берип, “хитай деңиз қирғиқи муһапизәт әтритиниң қаидигә хилап қилмишлириға болған наразилиқимизни әң қаттиқ шәкилдә ипадилидуқ. Бу наразилиқимиз хитайға охшаш һәқлиримизгә дәхли қилған барлиқ кишиләрни өз ичигә алиду. Барлиқ дөләтләргә охшаш хитайму хәлқара қанунға риайә қилиши керәк. Деңиз чеграмизға дәхли қилғучилар билән қилидиған күришимиз давамлишиду” дегән.

Өткән һәптә аргентина деңиз тәвәликидә белиқ тутқан бир хитай белиқчи кемиси аргентина деңиз әтритиниң агаһландурушиға пәрва қилмай давамлиқ аргентина деңиз тәвәликигә ичкириләп киргәнлики вә аргентина деңиз мудапиә әтритиниң параходини соқушқа урунғанлиқи үчүн, аргентина деңиз армийиси тәрипидин чөктүрүветилиш вәқәси йүз бәргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт