Hindistan dolqun eysa bilen birge yene ikki xitay öktichining wizisini bikar qilghan

Muxbirimiz erkin
2016.04.30

Hindistan hökümiti daramsaladiki milletler we diniy guruhlarning öz - ara di'alogigha teklip qilin'ghan ikki xitay öktichining wizisini bikar qilghan. Hindistan hökümiti ilgiri d u q ijra'iye komitétining mudiri dolqun eysaning wizisini bikar qilip, zor gholghula qozghighan idi.

Xitay tashqi ishlar ministirliqi dolqun eysaning wizisi bikar qilinish weqeside özlirining hindistan'gha bésim ishletkenlikini étirap qilghan. “Hindistan waqti” gézitining ashkarilishiche, hindistan hökümiti amérikida turushluq xitay öktichi lu jingxu'a bilen réy wang isimlik xongkongluq öktichining wizisini bikar qilghan.

Lu jingxu'a 25 - aprél nyu - yorktiki kénidiy xelq'ara ayrodromida ayropilan'gha chiqirilmighan. U shuninggha qeder wizisining bikar qilin'ghanliqini bilmeydiken. Xewerlerde, réy wangning shu küni oxshashla ayropilan'gha chiqirilmighanliqini bildürdi.

Lu jingxu'a 1989 - yildiki tyen'enmén weqeside nami chiqqan öktichilerning biri. Xitay hökümiti lu jingxu'ani “Jinayetchiler” tizimlikige kirgüzüp qoyghan. Lu jingxu'a axbarat wasitilirige bergen bayanatida, hindistanning herikitidin qattiq epsuslan'ghanliqini, buninggha xitayning sewebchi ikenlikini bildürgen.

“Hindistan waqti” gézitining qeyt qilishiche, hindistan hökümiti lu jingxu'aning sayahet matériyalliri “Toluq emes”, “Telepke toshmaydu” dégen bolsimu, emma bir hindistan emeldari xitay öktichilirining hindistanni ziyaret qilip, “Xitaygha qarshi teshwiqat bilen shughullinishi”, yéngi déhlining béyjinggha qaratqan siyasitige toghra kelmeydu, dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.