Hindistan xitayning uchquchisiz ayropilanlirining chégragha yéqin jaydiki heriketlirini közitiwatqanliqini bildürdi

Hindistan taratquliri 1 – dékabir künidiki xewiride, xitayning uchquchisiz ayropilanlirining bir qanche qétim  xitaygha yéqin sherqiy shimaldiki emeliy kontrol liniyesni boylap hindistan zéminigha qarap uchmaqchi bolghanliqini xewer qilghan.

Hindistanda chiqidighan “Asiya xelq'ara xewerler tori”ning xewiride éytilishiche, hindistan hawa armiyesi özlirining xitayning herikitini yéqindin közitiwatqanliqini bildürgen. Ular bayanatida mundaq dégen:  “Hindistan hawa armiyesi rayondiki kücheytilgen radar tori bilen sherqiy shimaldiki  xitayning uchush pa'aliyitini yéqindin közitidu. Adette weziyet tinch bolsimu, emma yéqinqi waqitlarda xitayning uchquchisiz ayropilanlirining emeliy kontrol liniyesi terepke qarap uchqan ehwallirimu yüz berdi”. 

Hindistan hawa armiyesi da'iriliri bayanatida yene, eger xitayning uchquchisiz ayropilanliri emeliy kontrol liniyesge parallél uchmay, hindistan zéminigha qarap uchqan teqdirde derhal kéreklik tedbir qollinidighanliqini eskertken.

Melum bolushiche, ikki terepning ladax rayonidiki térritoriyelik sürkilishliridin kéyin xitay – hindistan bu rayonda emeliy kontrol qilish liniyesi berpa qilip, her ikki döletning ayropilanlirini bu liniyening aldigha ötüshini chekligen iken.

Bügün, yeni 1- dékabir küni, amérika kéngesh palata ezasi marko rubiyo tiwittir arqiliq bu ehwalgha inkas qayturup, xitayni eyibligen. U bayanida :“ Xitay armiyesi tibetning hindistan bilen chégralinidighan detalashtiki rayonigha yéqin jayda herbiy qarawulxana qurdi. Yene kélip, tajawuzchiliq herbiy taktikisini ishlitip, igilik hoquqqa ige bir döletni qorqutup, tehdit séliwatidu. Biz muhim shérikimiz hindistan bilen birge” dep yazghan.