Һиндистан баш министири модиниң тәйвән пирезидентиниң тәбрикини қобул қилиши хитайни биарам қилған

Һиндистанда өткүзүлгән сайламда ғәлибә қилип, 3-қетим һиндистанниң баш министирлиқиға сайланған моди тәйвән пирезиденти ләй чиңдениң тәбрикини қобул қилған. Моди йәнә һиндистан билән тәйвән оттурисидики алақисини күчәйтишни халайдиғанлиқини билдүргән.

5-Июн чаршәнбә күни тәйвән пирезиденти ләй чиңде X тики рәсмий һесаби арқилиқ модиниң үчинчи қетим вәзипигә олтурғанлиқини тәбриклигән. Модиму X дики рәсмий һесабида буниңға җавабән “өзара мәнпәәт йәткүзидиған иқтисадий-техника шериклик мунасивитимиз давам қиливатқан бир пәйттә, мән мунасивәтлиримизниң техиму қоюқлишишини үмид қилимән” дәп язған.

Модиниң тәйвәнгә бәргән бу инкаси хитайниң қаттиқ оғисини қайнатқан.

“җәнубий хитай әтигәнлик почтиси” гезитиниң хәвиригә қариғанда, бүгүн, йәни 6-июн пәйшәнбә күни бейҗиңда өткүзүлгән мухбирларни күтүвелиш йиғинида хитай һөкүмити модиниң бу инкасиға дәрһал қарши инкас қайтурған. Хитай ташқи ишлар министирлиқиниң баянатчиси мав ниң “биз хитай билән дипломатик мунасивити бар һәрқандақ дөләтниң тәйвән даирилири билән һәрқандақ шәкилдики рәсмий алақисигә қәтий қарши туримиз” дегән.

Мав ниң йәнә һиндистанниң “бир хитай сиясити” ни етирап қилған дөләт икәнликини әслитип, “улар тәйвән тәрәпниң сиясий суйиқәстини билиши вә һошярлиқни өстүрүши керәк” дәп агаһландурған.

Һиндистан билән хитайниң мунасивити кейинки йилларда изчил начарлишишқа қарап йүзләнгән иди. Икки дөләт оттурисида давамлишиватқан чегра тоқунушидин башқа, хитайниң һинди-тинч окяндики зораванлиқ қилмишлириниң артип бериши сәвәбидин һиндистан америка вә башқа иттипақдаш дөләтләр билән болған һәрбий һәмкарлиқини күнсайин күчәйткән иди.

“җәнубий хитай әтигәнлик почтиси” гезитиниң дейишичә, хитай дөләт рәиси ши җинпиң үчинчи қетим һиндистан баш министири болған модини техи тәбриклимигән. У, модиниң бундин бәш йил илгирики иккинчи қетимлиқ сайлам ғәлибисидин бир күн кейинла дәрһал тәбрик сөзи әвәткән икән.