Hindistan bash ministiri modining teywen pirézidéntining tebrikini qobul qilishi xitayni bi'aram qilghan

Washin'gtondin muxbirimiz irade teyyarlidi
2024.06.06

Hindistanda ötküzülgen saylamda ghelibe qilip, 3-qétim hindistanning bash ministirliqigha saylan'ghan modi teywen pirézidénti ley chingdéning tebrikini qobul qilghan. Modi yene hindistan bilen teywen otturisidiki alaqisini kücheytishni xalaydighanliqini bildürgen.

5-Iyun charshenbe küni teywen pirézidénti ley chingdé X tiki resmiy hésabi arqiliq modining üchinchi qétim wezipige olturghanliqini tebrikligen. Modimu X diki resmiy hésabida buninggha jawaben “Öz'ara menpe'et yetküzidighan iqtisadiy-téxnika shériklik munasiwitimiz dawam qiliwatqan bir peytte, men munasiwetlirimizning téximu qoyuqlishishini ümid qilimen” dep yazghan.

Modining teywen'ge bergen bu inkasi xitayning qattiq oghisini qaynatqan.

“Jenubiy xitay etigenlik pochtisi” gézitining xewirige qarighanda, bügün, yeni 6-iyun peyshenbe küni béyjingda ötküzülgen muxbirlarni kütüwélish yighinida xitay hökümiti modining bu inkasigha derhal qarshi inkas qayturghan. Xitay tashqi ishlar ministirliqining bayanatchisi maw ning “Biz xitay bilen diplomatik munasiwiti bar herqandaq döletning teywen da'iriliri bilen herqandaq shekildiki resmiy alaqisige qet'iy qarshi turimiz” dégen.

Maw ning yene hindistanning “Bir xitay siyasiti” ni étirap qilghan dölet ikenlikini eslitip, “Ular teywen terepning siyasiy suyiqestini bilishi we hoshyarliqni östürüshi kérek” dep agahlandurghan.

Hindistan bilen xitayning munasiwiti kéyinki yillarda izchil nacharlishishqa qarap yüzlen'gen idi. Ikki dölet otturisida dawamlishiwatqan chégra toqunushidin bashqa, xitayning hindi-tinch okyandiki zorawanliq qilmishlirining artip bérishi sewebidin hindistan amérika we bashqa ittipaqdash döletler bilen bolghan herbiy hemkarliqini künsayin kücheytken idi.

“Jenubiy xitay etigenlik pochtisi” gézitining déyishiche, xitay dölet re'isi shi jinping üchinchi qétim hindistan bash ministiri bolghan modini téxi tebriklimigen. U, modining bundin besh yil ilgiriki ikkinchi qétimliq saylam ghelibisidin bir kün kéyinla derhal tebrik sözi ewetken iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.