Hindistanda xitay mallirini bayqut qilish herikiti qozghaldi

• Muxbirimiz irade
  2019-03-14

Xitay kommunist hökümiti pakistanni baza qilghan “Jeyishi muhemmed” namliq qoralliq guruppining b d t xewpsizlik kéngishi teripidin qara tizimlikke élinishini tosup qoyghan.

Roytérs agéntliqining xewer qilishiche, mezkur qoralliq guruppa 14-féwral küni keshmirdiki hindistan saqchilirigha hujum qilip, az dégende 40 neper kishining ölümige seweb bolghan. Bu keshmirning talash-tartishtiki 30 yilliq tarixida az körülgen qanliq weqelerning biri bolup hésablinidiken.

Weqedin kéyin amérika, en'giliye we firansiye qatarliq döletler b d t xewpsizlik kéngishidin yuqiriqi bu qoralliq guruppining bashliqi mes'ud azhargha qoral émbargosi, sayahet cheklimisi qoyush we mal-mülkini tonglitishni telep qilghan. Emma xitay bu telepte bezi “Téxnikiliq mesililer” barliqini ilgiri sürüp, xewpsizlik kéngishide qarar élinishini toxtitip qoyghan.

Hindistan tashqi ishlar ministirliqi xitayning bu herikitidin qattiq epsuslan'ghanliqini ipade qilish bilen birge mezkur qararning maqullinishi üchün barliq tedbirlerni ishqa salidighanliqini bildürgen. Amérika xitayning herikitini “Rayonda muqimliq we tinchliq berpa qilish heqqidiki ortaq kélishimlerge qarshi chiqqanliq,” dégen.

Xewerlerge qarighanda, xitayning yuqiriqi bu herikiti hindistanda xitay mehsulatlirining bayqut qilinishigha yol achqan. Hindistandiki muhim iqtisadiy we siyasiy tesir küchke ige bolghan we 70 milyondin oshuq ezasi bolghan “Hindistan tijaretchiler ittipaqi” peyshenbe küni bayanat élan qilip, memliket miqyasi boyiche xitay mallirini bayqut qilish herikiti qozghighan. Ular 19-mart küni xitaygha “Bir ders bérip qoyush üchün barliq xitay mallirini köydüridighanliqi” ni jakarlighan.