Һиндистан билән хитай чеградики җиддийликни пәсәйтишкә келишкән

Вашингтондин мухбиримиз әркин тәйярлиди
2024.10.21

Һиндистан дипломатлириниң билдүрүшичә, һиндистан билән хитай йеқинқи йилларда әҗәллик тоқунушларниң йүз беришини кәлтүрүп чиқарған һималая райони чеграсидики җиддийликни пәсәйтишкә келишкән. Һиндистан билән хитайниң дунядики һәрбий тиркишиш әң кәскин районлардин бири болған һималая чеграсидики җиддийликни пәсәйтиш келишиминиң, һиндистан баш министири моди билән хитай рәиси ши җинпиң, кесәк дөләтлириниң 22-өктәбир русийәниң қазан шәһридә башлинидиған башлиқлар йиғинида учришишиниң һарписида елан қилиниши диққәт қозғимақта.

BBC Ниң хәвәр қилишичә, һиндистан ташқи ишлар министири викрам мисри 21-өктәбир күни икки тәрәпниң “2020-йили йүз бәргән чегра йонидики мәсилиләрни пәсәйтиш вә һәл қилиш” қа келишкәнликини билдүргән.

Һиндистан чегра мудапиә қисимлири билән хитай чегра мудапиә қисимлири 2020-йили 6-айда, уйғур елиниң ақсайчин тағлиқ райони билән һиндистанниң ладах райони чеграсидики галван вадисида таш-тоқмақлар билән урушуп, 20 дәк һиндистан әскири өлгән. Хитай қанчә әскириниң өлгәнликини елан қилмиған. Бу икки тәрәп арисида 1975-йилдин бери ладах-ақсайчин чеграсида йүз бәргән әҗәллик тоқунуши болуп қалған. Арқисидинла 2022-йили 12-айда, икки тәрәп чегра мудапиә қисимлири тибәт-һиндистан чеграсиниң һиндистан контроллуқидики аруначал прадеш штати чеграсиниң әмәлий чегра контрол линийәсидә йәнә тоқушқан. Мәлум болушичә, икки тәрәп һазирға қәдәр аз дегәндә 17 қетим чегра сөһбити елип барған болсиму, лекин буниң чеградики җиддийликни пәсәйтиштә әмәлий үнүми болмиған.

BBC Ниң билдүрүшичә, викрам мисри һиндистан-хитай чегра районидики әмәлий чегра контрол линийәсидә қаравуллуқ қилишниң тәртипи һәққидә келишим һасил қилинди, бу келишим 2020-йили бу районларда мәйданға кәлгән мәсилиләрниң һәл қилиниши, пәсәйтилишигә йол ачти” дегән болсиму, әмма у бу келишимниң тәпсилати һәққидә мәлумат бәрмигән. Нөвәттә, моди билән ши җинпиңниң қазанда өткүзүлидиған кесәк дөләтлири йиғинида айрим учришидиған-учрашмайдиғанлиқи мәлум әмәс икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.