Hindistan bilen xitay chégradiki jiddiylikni peseytishke kélishken

Hindistan diplomatlirining bildürüshiche, hindistan bilen xitay yéqinqi yillarda ejellik toqunushlarning yüz bérishini keltürüp chiqarghan himalaya rayoni chégrasidiki jiddiylikni peseytishke kélishken. Hindistan bilen xitayning dunyadiki herbiy tirkishish eng keskin rayonlardin biri bolghan himalaya chégrasidiki jiddiylikni peseytish kélishimining, hindistan bash ministiri modi bilen xitay re'isi shi jinping, kések döletlirining 22-öktebir rusiyening qazan shehride bashlinidighan bashliqlar yighinida uchrishishining harpisida élan qilinishi diqqet qozghimaqta.

BBC Ning xewer qilishiche, hindistan tashqi ishlar ministiri wikram misri 21-öktebir küni ikki terepning “2020-Yili yüz bergen chégra yonidiki mesililerni peseytish we hel qilish” qa kélishkenlikini bildürgen.

Hindistan chégra mudapi'e qisimliri bilen xitay chégra mudapi'e qisimliri 2020-yili 6-ayda, Uyghur élining aqsaychin taghliq rayoni bilen hindistanning ladax rayoni chégrasidiki galwan wadisida tash-toqmaqlar bilen urushup, 20 dek hindistan eskiri ölgen. Xitay qanche eskirining ölgenlikini élan qilmighan. Bu ikki terep arisida 1975-yildin béri ladax-aqsaychin chégrasida yüz bergen ejellik toqunushi bolup qalghan. Arqisidinla 2022-yili 12-ayda, ikki terep chégra mudapi'e qisimliri tibet-hindistan chégrasining hindistan kontrolluqidiki arunachal pradésh shtati chégrasining emeliy chégra kontrol liniyeside yene toqushqan. Melum bolushiche, ikki terep hazirgha qeder az dégende 17 qétim chégra söhbiti élip barghan bolsimu, lékin buning chégradiki jiddiylikni peseytishte emeliy ünümi bolmighan.

BBC Ning bildürüshiche, wikram misri hindistan-xitay chégra rayonidiki emeliy chégra kontrol liniyeside qarawulluq qilishning tertipi heqqide kélishim hasil qilindi, bu kélishim 2020-yili bu rayonlarda meydan'gha kelgen mesililerning hel qilinishi, peseytilishige yol achti” dégen bolsimu, emma u bu kélishimning tepsilati heqqide melumat bermigen. Nöwette, modi bilen shi jinpingning qazanda ötküzülidighan kések döletliri yighinida ayrim uchrishidighan-uchrashmaydighanliqi melum emes iken.