Hindistan bilen xitay chégrasida toqunush yüz bergen
2022.12.13
Hindistan bilen xitay eskerliri aldinqi hepte ikki döletning talashta qalghan chégra rayonida toqunushqan.
Amérika döletlik taratqu shirkiti (NBC) ning 13-dikabir küni xewer qilishiche, hindistan dölet mudapi'e ministiri 12-ayning 12-küni bu weqening rastliqini éytqan. Bu toqunush 2020-yil 6-ayda hindistan bilen xitay chégrasida yüz bergen qanliq toqunushtin kéyin chiqqan zorawanliq weqesi iken.
Xewerde éytilishiche, xitay armiyesi 9-dékabir küni hindistanning sherqidiki arunachél pradésh (Arunachel Pradesh) rayonigha qanunsiz kirip, yarluzangbu deryasi boyigha yéqin chégra rayondiki talashta qalghan zéminni özgertmekchi bolghanda hindistan eskerliri bilen toqunushqan. Hindistan terepning bildürüshiche, bu toqunushta hindistan eskerliri we xitay eskerliri teng yarilan'ghan.
Hindistan bilen xitayning chégrasi gherbte ladax yolidin sherqte arunachél pradéshqiche sozulghan bolup, ikki döletning chégrasidiki éniqsizliq 1962-yil yüz bergen xitay-hindistan urushidin tartip nechche on yil dawam qilip kelgen toqunushlargha seweb bolghanidi. 2020-Yil yüz bergen toqunushta 20 hindistan eskiri, 4 xitay eskiri ölgenidi.
Xewerde körsitilishiche, hindistan bilen xitay hazir ikki döletning chégrasini boylap on minglarche esker, tanka we küreshchi ayropilanlarni orunlashturghan. Xitay terep chégradiki eskerlirini azaytish heqqide hindistan'gha bergen wedisige emel qilmighan. Bu ehwalda ikki dölet otturisidiki jiddiy weziyet yenila dawam qilidiken.