Uyghurlar mesilisi hindistanda qiziqish qozghidi
2016.05.03
Amérika Uyghur birleshmisining re'isi élshat hesenning daramsaladiki “Asiya démokratiye munbiri” yighinigha qatnishishi bilen Uyghurlar heqqide téximu köp melumatlargha ige bolghan hindistan jama'iti arisida Uyghurlar heqqide bir zor qiziqish peyda bolghanliqi melum.
Hindistandiki “Télégramma” we “Bazar téz pochtisi” qatarliq chong gézitler oqurmenlerge omumiy xaraktérlik chüshenche bérish meqsitide mexsus Uyghurlar we ularning hazirqi ehwali toghrisida zor sehipilik maqalilerni élan qilghan.
Bu maqalilerde Uyghurlarning milliy kimliki, xitaylarning Uyghurlar rayonigha köchmen bolush tarixi, Uyghurlarning xitay hökümranliqida turuwatqan hazirqi haliti we Uyghur tarixigha mensup uzaq ötmüsh heqqidiki bayanlar tepsiliy orun igiligen. “Bazar téz pochtisi” géziti maqaliside xitay hökümitining qedimiy qeshqerni chéqiwetkenliki heqqide mexsus toxtilip, “Mushundaq chéqish tedbirliri nawada hindistandiki heyder'abad yaki kona déhli shehirige oxshash qedimiy medeniyet merkezlirige qaritilghan bolsa u halda hindistanliqlarning hökümet heqqide qandaq pikirde bolidighanliqini tesewwur qilip béqing!” dep yazghan.
Maqalilerde birdek Uyghurlarning xitaydiki milliy, diniy we medeniyet siyasetlirining bésimi arqisida zorluq we qarshiliq yoligha méngishqa mejbur boluwatqanliqi alahide eskertilgen.
Xewerlerdin melum bolushiche, modi hökümiti bu qétimqi yighin meydanigha erkin asiya radiyosidin bashqa axbarat wasitilirining kirishini men'i qilghan. Mushu sewebtin yighin qatnashquchiliri yighin meydanigha a'it bir qisim ün-sin matériyallirini ijtima'iy taratqular arqiliq teshwiq qilghan.