"Jakarta pochta géziti" xitayning Uyghurlarni hindonéziyege térrorchi dep körsitiwatqanliqini qeyt qildi


2016-12-23
Share

Hindonéziyening "Jakarta pochta géziti" 22‏-dékabir maqale élan qilip, xitayning Uyghurlarni hindonéziyege térrorluq tehdit dep körsitiwatqanliqini ilgiri sürgen.

Maqalide qeyt qilishiche, xitayning meqsiti bu arqiliq özining Uyghurlargha tutqan qattiq qol mu'amilisini hindonéziye xelqighe heqliq qilip körsitishken.

"Yéngi amérika bixeterlik" tetqiqat ornining mutexessisi patrik méyér qelemge alghan maqalide: "Nopusi 220 milyonliq hindonéziyediki köp sanliq musulmanlar xitay hökümitining Uyghur qérindashlirining diniy hoquqini basturushigha nahayiti sezgür qaraydu, hetta xitaygha dostane bolghan hindonéziye hökümitimu Uyghurlarning hoquqi we bixeterlik mesiliside béyjing hökümiti bilen hemkarlishishqa bek isteklik emes" déyilgen.

Maqalide körsitishiche, hindonéziye hökümiti xitayning hindonéziyede térrorluq bilen eyiblinip 6 yilliq qamaq jazasigha höküm qilin'ghan bir guruppa Uyghurni qayturup bérish telipini ret qilghan.

Maqalide, bir yuqiri derijilik hindonéziye emeldarining sözni neqil keltürüp, uning "Uyghurlarni xitaygha qayturup bérish ularni öltürüsh bilen teng. Zor éhtimalliq, xitay hökümiti bundaq kishilerge derhal ölüm jazasi béridu" dégenlikini bildürgen. Maqalide qeyt qilishiche, bu emeldarning sözi hindonéziye xitayning Uyghurlargha tutqan mu'amilisidin qanchilik bi'aram boluwatqanliqini körsitip béridiken.

Maqalide, shuning bilen xitay "Hindonéziye xelqi we hökümitini béyjingning qattiq wastilerni qollinip, Uyghurlarning hoquqini qisishi tamamen heqliq, Uyghurlar hindonéziyening hésdashliq qilishigha layiq emes" dégen'ge qayil qilish péyigha chüshkenlikini ilgiri sürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet