Hindonéziyede bir Uyghur térrorluq bilen eyiblinip 6 yilliq késilgen
2016.11.02
Xelq'ara taratqularning xewer qilishiche, hindonéziye sot mehkimisi charshenbe küni nurmemet abdulla elfarisi isimlik bir Uyghurni térrorluq bilen eyiblep 6 yilliq qamaqqa höküm qilghan.
Firansiye axbarat agéntliqining bügünki bu heqtiki xewiride déyilishiche, mehkum nurmemet abdulla islam döliti teshkilati bilen baghlinishi bolghan hindonéziyediki bahrun neyim teshkilatining buyruqi boyiche jakarta saqchi bashliqini öltürüsh we bir shi'eler meschitini partlitish pilanini ijra qilmaqchi bolghan. Xewerde déyilishiche, sotchi nowriy tamy mehkumning sotta jinayitini iqrar qilghanliqini éytqan. Emma xewerlerde, sotta nurmemet abdullaning adwokati bar-yoqluqi tilgha élinmighan. Nurmemet abdulla ötken yili dékabirda jakarta saqchiliri teripidin islam döliti teshkilati bilen alaqisi bar, dep qarilip tutqun qilin'ghan.
Uyghur milliy herikiti rehbiri rabiye qadir xanim hindonéziyede tutqun qilin'ghan Uyghurlar heqqidiki bayanatida, bir türküm Uyghur yashlirining chet'ellerge erkinlik izdep chiqqanliqi we Uyghur rayonidiki zulumgha qarshi chare izdesh meqsitide chet'ellerdiki oxshimighan guruppilar bilen bilip yaki bilmey chétilip qiliwatqanliqini, shunga hindonéziyeni Uyghur tutqunlarni bir terep qilghanda ularning wetinidin ayrilishtiki seweb we meqsetlirini nezerdin saqit qilmasliqqa chaqirghan idi.