Һиндонезийә һөкүмити уйғурларниң авази болушқа чақирилди

Мухбиримиз ирадә
2019.11.14
Share on WhatsApp
Share on WhatsApp

“җәнубий хитай әтигәнлик гезити” дә 13-ноябир күни “һиндонезийә уйғурлар үчүн сөзлиши керәк. Гамбийәниң роһингалар үчүн қилғиниға қараңлар” мавзулуқ бир мулаһизә мақалиси елан қилинди.

Мақалидә бу йил өктәбирдә американиң һиндонезийәдә турушлуқ баш әлчиси җосеф донованниң һиндонезийәдә 30 милйондин ошуқ әзаси болған “муһәммәдийә” тәшкилатиниң рәһбәрлири билән учришип, уларни хитай һөкүмитиниң уйғур мусулманлириға йүргүзүватқан кишилик һоқуқ дәпсәндичиликигә қарши аваз чиқиришқа чақирған болсиму, бирақ һазирғичә уларниң бу мәсилидә сүкүттә туруватқанлиқи, һиндонезийә һөкүмитиниңму бу мәсилидә бүгүнгичә һечқандақ рәсмий бир позитсийә ипадилимигәнлики тәнқид қилинған.

Мақалә апторлири йеқинда гамбийә һөкүмитиниң 11-ноябир күни “ислам һәмкарлиқ тәшкилати” намида б д т алий сотиға әрз сунуп, бирма һөкүмитини “ирқий қирғинчилиқ қилиш” җинайити билән әйиблигәнликини мисал берип, һиндонезийә һөкүмитиниму буниңдин өгинишкә дәвәт қилған.

Улар һиндонезийә һөкүмитиниң ислам һәмкарлиқ тәшкилати вә шәрқий-җәнубий асия дөләтлири иттипақи қатарлиқ органлар арқилиқ хитай һөкүмитигә уйғур мәсилисидә бесим ишлитишкә чақирған.

Мәлум болушичә, һиндонезийә ташқи ишлар министири ретно марсуди йеқинда қилған сөзидә һиндонезийә һөкүмитиниң хәвпсизлик кеңишиниң даимий болмиған әзаси болуш сүпити билән бир қанчә кишилик һоқуққа мунасивәтлик мәсилиләрни кеңәштә оттуриға қойидиғанлиқини билдүргән икән. Мақалә апторлири буни “һиндонезийә ташқи ишлар министири үчүн уйғур мәсилисини оттуриға қойидиған әң яхши пурсәт,” дәп көрсәткән.

Көп көрүлгән хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.