Американиң һиндонезийә баш әлчиси һиндонезийәдики мусулман тәшкилатлирини уйғурлар үчүн гәп қилишқа үндигән

Мухбиримиз әркин
2019-10-16
Елхәт
Пикир
Share
Принт

Американиң һиндонезийәдә турушлуқ баш әлчиси җосеф кичик доновән һиндонезийәдики әң чоң мусулман тәшкилатлириниң рәһбәрлирини зиярәт қилип, уларни хитайниң уйғурларға тутқан муамилисигә қарши ипадә билдүрүшкә үндигән. «Җакарта почтиси» гезитиниң хәвәр қилишичә, доновән 15‏-өктәбир һиндонезийәдики муһәммәдийә тәшкилатиниң рәһбәрлирини зиярәт қилип, уйғур мәсилисини оттуриға қойған. Доновән муһәммәдийә тәшкилатиниң рәһбири хедар нашир билән көрүшкәндин кейин мухбирларға сөз қилип, «мән муһәммәдийә тәшкилатини хитайдики уйғурларниң бастурулушиға қарши давамлиқ ипадә билдүрүшкә илһамландурдум. Шундақла биз қайта көрүшүп, пүтүн бу мәсилиләрдә йеқиндин биргә ишләшкә қошулдуқ» дегән.

«Җакарта почтиси» ниң хәвиридә қәйт қилинишичә, доновән өзиниң бу зиярәт арқилиқ американиң хитайдики уйғур районида «тәхминән бир милйондин артуқ уйғур» ниң бастурулушқа учраватқанлиқиға болған әндишисини йәткүзүп қоймақчи болғанлиқини билдүргән. Хәвәрдә, доновәнниң һиндонезийәдики йәнә бир чоң мусулманлар тәшкилати болған наһдәтул өлимани зиярәт қилиши 16‏-өктәбиргә тоғриланғанлиқини билдүрмәктә.

У, өзиниң һиндонезийәдики йәрлик мусулман тәшкилатлириға қилған зияритиниң кечиккәнлики, «бу йилниң башлирида зиярәт қилишни ойлашқан болсиму, бирақ вақит яр бәрмигәнлики» ни билдүргән. Һалбуки, «җакарта почтиси» гезитиниң билдүрүшичә, муһәммәдийә тәшкилатиниң баш катипи абдул мути, кишилик һоқуқ дәпсәндичиликигә даир учурларниң адил ениқлиниши вә пакитларға тайинилиши керәкликини билдүрүп, «бу мәсилә бир дөләтниң йәнә бир дөләткә қарши қоллинидиған козуриға айлинип қелишиға қарши туримиз» дегән. Доновәнниң наһдәтул өлима билән болған көрүшүшиниң нәтиҗиси қандақ болғанлиқи биз мәлум әмәс. Әмма наһдәтул өлиманиң рәһбири саид ақил сраҗ илгири «һиндонезийәниң шинҗаңдики кишилик һоқуқ дәпсәндичиликигә әндишә қилиши һаҗәтсиз» икәнлики, чүнки у йәрниң әһвалиниң «унчилик начар әмәслики» ни билдүргән. Хитай һөкүмити бу икки диний тәшкилатни өткән йили уйғур аптоном районида зиярәткә орунлаштурғаниди.

Пикирләр (0)
Share
Толуқ бәт