Amérikaning hindonéziye bash elchisi hindonéziyediki musulman teshkilatlirini Uyghurlar üchün gep qilishqa ündigen

Muxbirimiz erkin
2019-10-16
Élxet
Pikir
Share
Print

Amérikaning hindonéziyede turushluq bash elchisi joséf kichik donowen hindonéziyediki eng chong musulman teshkilatlirining rehberlirini ziyaret qilip, ularni xitayning Uyghurlargha tutqan mu'amilisige qarshi ipade bildürüshke ündigen. "Jakarta pochtisi" gézitining xewer qilishiche, donowen 15‏-öktebir hindonéziyediki muhemmediye teshkilatining rehberlirini ziyaret qilip, Uyghur mesilisini otturigha qoyghan. Donowen muhemmediye teshkilatining rehbiri xédar nashir bilen körüshkendin kéyin muxbirlargha söz qilip, "Men muhemmediye teshkilatini xitaydiki Uyghurlarning basturulushigha qarshi dawamliq ipade bildürüshke ilhamlandurdum. Shundaqla biz qayta körüshüp, pütün bu mesililerde yéqindin birge ishleshke qoshulduq" dégen.

"Jakarta pochtisi" ning xewiride qeyt qilinishiche, donowen özining bu ziyaret arqiliq amérikaning xitaydiki Uyghur rayonida "Texminen bir milyondin artuq Uyghur" ning basturulushqa uchrawatqanliqigha bolghan endishisini yetküzüp qoymaqchi bolghanliqini bildürgen. Xewerde, donowenning hindonéziyediki yene bir chong musulmanlar teshkilati bolghan nahdetul ölimani ziyaret qilishi 16‏-öktebirge toghrilan'ghanliqini bildürmekte.

U, özining hindonéziyediki yerlik musulman teshkilatlirigha qilghan ziyaritining kéchikkenliki, "Bu yilning bashlirida ziyaret qilishni oylashqan bolsimu, biraq waqit yar bermigenliki" ni bildürgen. Halbuki, "Jakarta pochtisi" gézitining bildürüshiche, muhemmediye teshkilatining bash katipi abdul mut'i, kishilik hoquq depsendichilikige da'ir uchurlarning adil éniqlinishi we pakitlargha tayinilishi kéreklikini bildürüp, "Bu mesile bir döletning yene bir döletke qarshi qollinidighan kozurigha aylinip qélishigha qarshi turimiz" dégen. Donowenning nahdetul ölima bilen bolghan körüshüshining netijisi qandaq bolghanliqi biz melum emes. Emma nahdetul ölimaning rehbiri sa'id aqil sraj ilgiri "Hindonéziyening shinjangdiki kishilik hoquq depsendichilikige endishe qilishi hajetsiz" ikenliki, chünki u yerning ehwalining "Unchilik nachar emesliki" ni bildürgen. Xitay hökümiti bu ikki diniy teshkilatni ötken yili Uyghur aptonom rayonida ziyaretke orunlashturghanidi.

Toluq bet