Хоңкоңда бир милйон адәм намайиш қилип, "қачқунларни өткүзүп бериш қануни" ға қарши чиқти

Мухбиримиз әркин
2019-06-10
Share

Бир милйондин артуқ хоңкоң пуқраси 9‏-июн күни намайиш қилип, хоңкоң мәмурий даирилириниң хитай чоң қуруқлуқиға "қачқун өткүзүп бериш қанун лайиһиси" гә қарши чиқти. Мәзкур қанун лайиһиси хоңкоңдики өктичи партийә-гуруһлар вә кишилик һоқуқ тәшкилатлириниң қарши турушиға учрап кәлгән. Улар мәзкур қанун лайиһиси хоңкоңниң әдлийә мустәқиллиқиға бузғунчилиқ қилидиғанлиқини илгири сүрүп кәлгәниди. Йәкшәнбә күнки намайишни "пуқралар кишилик һоқуқ фронти" намлиқ аммиви гуруһ тәшкиллигән болуп, мәзкур гуруһ намайишқа 1 милйон 300 миң кишиниң қатнашқанлиқини илгири сүрмәктә. Америка CNN телевизийиси ториниң хәвиридә қәйт қилинишичә, бу намайиш хоңкоң 1997‏-йили хитайға қайтуруп берилгәндин бери партлиған әң зор көләмлик намайиш икән. Хәвәрдә, сақчи тәрәпниң намайишқа 240 миңдәк адәм қатнашқанлиқини илгири сүргәнлики ейтилсиму, лекин униңға нопуси 7 милйон 480 миң кишилик бу шәһәрдики һәр 7 кишиниң бири қатнашқанлиқи билдүрүлгән.

Көзәткүчиләрниң қәйт қилишичә, бейҗиң һөкүмити 1955‏-йили "уйғур аптоном райони" қурулғанда уйғурларға бәргәндәк 1997‏-йили хоңкоңни өткүзүвалғанда хоңкоңлуқларға бәргән униң ички ишлириға арилашмаслиқ һәққидики вәдилиригә әмәл қилмиған. Көзәткүчиләр, бейҗиң һөкүмитиниң бәргән вәдилиригә әмәл қилмайла қалмай, униң ички ишлириға қопаллиқ билән арилишиши милйон кишилик бу намайишниң партлишиға сәвәб болғанлиқини билдүрмәктә. 

9‏-Июн күни хоңкоңдики викторийә бағчисиға топланған намайишчилар хоңкоң парламент бинасиға қарап йүрүш қилип, "қачқунларни өткүзүп бериш қануни" ниң бикар қилиниши, хоңкоң валийси "кәрий линниң истепа бериши" ни тәләп қилған. 

CNN Ниң хәвиридә қәйт қилинишичә, намайиш җәрянида аз дегәндә 7 киши тутқун қилинған. Мәзкур намайиш уйғур районида 2 милйондәк уйғур, қазақ вә башқа мусулманлар тутқун қилинип, уларниң тили, мәдәнийити, диний етиқади чәкләнгән, бу, ғәрб әллириниң қаттиқ тәнқидигә учрап, зор "хәлқара кишилик һоқуқ кризиси" айланған бир мәзгилдә партлап, хәлқара җәмийәтниң диққитини қозғиди. Америка ташқи ишлар министирлиқи баянат елан қилип, американиң хоңкоң һөкүмити оттуриға қойған "қачқунларни өткүзүп бериш қанун лайиһиси" гә диққәт қиливатқанлиқи вә көзитиватқанлиқини билдүргән. Баянатта: "бир дөләттә икки хил түзүм давамлиқ хоритишқа учрап, бу, хоңкоңниң узун йиллар мабәйнидә тикләнгән хәлқара ишлардики орнини зиянға учратмақта" дейилгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт