Uyghur diyaridiki hoquq teqsimati nöwettiki ré'alliqni téximu roshen eks ettürdi

Muxbirimiz eziz
2021-10-26
Share

25-Öktebir küni chaqirilghan Uyghur aptonom rayonluq partkomning 10-nöwetlik birinchi omumi yighinida xitay kompartiyesining Uyghur rayonidiki yéngi nöwetlik rehberlik qatlimi "Saylap chiqilghan". Yeni Uyghur aptonom rayonluq partkomning sékritarliri, da'imiy hey'etliri, intizam tekshürüsh komitétining sékritarliri we hey'etliri atalmish "Saylam" arqiliq békitilgenliki élan qilin'ghan.

Xitay hökümitining bashqurushidiki "Tengritagh" torining bu heqtiki xewiride éytilishiche, chén chu'en'go dawamliq Uyghur aptonom rayonluq partkomning birinchi sékrétari bolghan. Uyghur aptonom rayonluq partkomning eng yadroluq rehberlik kolliktipi bolghan 15 neper da'imiy hey'et ezasimu qaytidin "Saylap chiqilghan" bolup, bularning ichide töt neper Uyghur we bir qazaq bolghandin bashqa qalghan on kishining pütünley xitaylardin bolushi, her sahening diqqitini qozghighan. Shu künning özide "Saylap chiqilghan" Uyghur aptonom rayonluq intizam tekshürüsh komitétining 47 neper ezasi ichide alte neper Uyghur bolghandin bashqa, qalghan kishilerning hemmisi dégüdek xitaylardin teshkil tapqan.

Xitay hökümiti herwaqit Uyghur diyaridiki siyasiy basturush heqqide söz bolghanda, özlirining izchil "Qanun boyiche ish körüp kéliwatqanliqi" ni tekitlep kelgen idi. Emma bu qétimqi yéngi nöwetlik hoquq teqsimati we bu qétimliq atalmish "Saylam" ning netijisi, xitay hökümiti élan qilghan aptonomiye qanunidiki munasiwetlik maddilarning emeliyette qeghez yüzidiki saxta "Aptonomiye" ikenlikini yene bir qétim ispatlap körsetken.

Washin'gton shehridiki jorji tawn uniwérsitétining proféssori jéymis milward bu heqtiki léksiyeliride köp qétimlap: "Xitay hökümiti wede qilghan aptonomiye peqet qeghez yüzidila mewjut. Xitay hökümitining aptonomiye heqqidiki qanunlarni qandaq ayaq-asti qilidighanliqini biz Uyghur rayonida we xongkongda qayta-qayta körmektimiz," dégen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet