Xitayning xu'awéy shirkiti ‍özini qutquzush helekchilikige chüshüp qalghan

Ikki yil awwal dunyaning G-5 qurulushini kontrol kélish pilani qurup, gherb döletlirini we kishilik hoquq teshkilatlirini endishige salghan xitayning xu'awéy shirkiti, nöwette ‍özini qandaq qoghdap qélishning helekchilikige chüshüp qalghan. “Blumbérg” agéntliqining xewer qilishiche, xu'awéyning bu ehwalgha chüshüp qélishigha béyjingning urushqaqliqi sewebchi iken.

“Blumbérg” da 19-séntebir élan qilin'ghan “Xu'awéyning töwenlishi béyjingning néme üchün hökümranliq talishishita qiynilidighanliqini körsetti” mawzuluq xewerde, xu'awéyning yéqinqi 2 yil mabeynide töwenlishining “Eng chong gé'o-siyasi tereqqiyat” netijisi ikenliki tekitlen'gen.

Xewerde éytilishiche, 2019-yili dunyaning G-5 qurulushi üchün riqabetke chüshken xu'awéy, bügünki künde peqet qandaq saqlinip qélishnila oylaydiken. Xewerde, xu'awéyning töwenlishining ibretlik bir qanche seweblirining barliqi, bu, xitayning eng yaman düshminining da'im uning özi ikenlikini körsitip bergenliki, chünki xitayning yersharida dogma halda üstünlükke intilishi uning reqiplirini köpeytkenliki bildürülgen. Amérika hökümiti ilgiri xu'awéyni uning xitay kompartiyesi bilen bolghan alaqisi we amérikaning émbargo qararlirigha xilapliq qilishi seweblik jazalighan.

Xu'awéy shirkiti yene kishilik hoquq teshkilatliri teripidinmu xitayning Uyghur élide yuqiri téxnikiliq nazaret sistémisi qurup, Uyghurlargha irqiy qirghinchiliq qilishigha yardemlishish bilen eyiblinip kelgen. Bu shirket sabiq prézidént trampning 2019-yili bir mezgil uninggha bezi sodida chek qoyushi bilen téximu qiyin ehwalgha chüshüp qalghanidi. “Blumbérg xewerliri” ning éytishiche, hazir xu'awéy üstünlük talishishni qoghlayshmaydiken. Bu shirketning mudiri “Bizning meqsitimiz saqlinip qélish” dégen.