Uyghurlar xu'awéy shirkitining sinaq obiyékti qilin'ghan

CNBC Téléwiziye torining 9-dikabir künidiki xewirige qarighanda, xitayning xu'awéy shirkiti Uyghur musulmanlirini perqlendüreleydighan we saqchilarni agahlanduralaydighan yumshaq détalni sinaq qilghan.

Xewerde körsitilishiche yéngi bir doklat élan qilin'ghan. Doklatta déyilishiche xu'awéy shirkiti xitaydiki eng chong sün'i eqil shirkiti “Mégwiy” (Megvii) bilen birliship yéngi chiray tonush sistémisini sinaq qilghan. Bu sistéma mexsus az sanliq millet-musulmanlarni bayqash xususiyitige ige bolup, bayqalghan haman hökümet da'irilirige agahlandurush béridiken.

Hetta sinaqning yene bir türi mexsus “Uyghur agahlandurushi” namliq iqtidar iken. Sin nazaretchiliki, doklat, tetqiqat we sinaq netijisini yetküzüshtiki dunyadiki aldinqi qatardiki organ-IPVM ning 2018-yilidiki doklatigha qarighanda, bu yumshaq détalning yene bir alahidiliki “Yüz analizi” bolup, “Millet” ni ayriyalaydiken.

Xu'awéy yaki mégwiy shirketliri sin nazaretchiliki, doklat, tetqiqat we sinaq netijisini yetküzüshtiki dunyadiki aldinqi qatardiki organ-IPVM teripidin ashkarilan'ghan höjjette déyilgenlerni ret qilmighan.

Amérika hökümiti éyjingning Uyghur rayonida yuqiri téxnikiliq nazarat sisitimisidin paydilinip, Uyghur, qazaq we bashqa musulman milletlerge qaritilghan “Basturush, keng kölemde xalighanche tutqun qlish” tek kishilik hoquq depsendichilikini eyibligenidi.

Amérika soda ministirliqi sana'et bixeterlik idarisimu 17-awghust xu'awéy shirkitige chétishliq 38 shirketni “Qara tizimlik” ke alghanliqini élan qilghanidi.