Heptilik xewerler: “Hyugo bos bilen walkéswagén qul qilin'ghan Uyghurlardin paydilinish arqiliq tarixni tekrarlidi”

Amérika xelqara diniy erkinlik komitétining komissari nuri türkel bilen amérikadiki “Simon weyzental merkizi” yer shari ijtima'iy heriket programmisining dériktori rabay abraham kupér 1-aprél “Heptilik xewerler” zhornilida maqale élan qilip, dangliq gérmaniye markisi hyugo bos bilen wolkés-wagénni tenqid qilghan. Maqalide éytilishiche, hyugo bos bilen wolkés-wagén qul qilin'ghan Uyghurlardin paydilinish arqiliq tarixni tekrarlimaqta iken.

Maqalide Uyghurlar weziyitining yehudilarning misirdin chiqish hékayisige oxshimaydighan yéri— bu irqiy qirghinchiliqning hazir yüz bériwatqanliqi, hyugo bos we wolkés-wagénning natsislar gérmaniyeside yehudilarni qul qilip ishlitishtek kechmishliridin sawaq almighanliqi tenqidlen'gen. Maqalide tekitlishiche, 2-dunya urushida qul ishchilarni natsist oftsérlirining formisini tikishke salghan we bu ötmüshidin “Pushayman qilghanliqi” ni bildürgen hyugo bosning “Shinjangdiki sodisida pewqul'adde sezgür bolushi telep qilinidiken.”

Maqalide yene wolkés-wagénning burun natsistlar hakimiyitining bir parchisi bolup, yehudilar we yawropadiki bashqa xelqlerni qul emgikige sélishtek kechmishidin sawaq almighandek qiliwatqanliqi, uning ürümchide aptomobil zawuti bolsimu, biraq uningda herqandaq bir mesile barliqini ret qilip kelgenlikini tenqid qilghan. Maqalide körsitishiche, gérmaniye hökümiti özining ötmüshidin sawaq élip, hyugo bos bilen wolkés-wagéndin ularning “Shinjang teminat zenjiride pakiz bolushini telep qilishi kérek” iken.