Hüseyin xaqqani jaw lijiyenni “Nomussizliq” bilen eyiblidi

Pakistanning amérikida turushluq sabiq aliy derijilik déplomati hüseyin xaqqani xitayning islam'abadta turushluq bash elchi yardemchisi jaw lijiyenni “Nomussizliq” bilen eyibligen. Bu eyibleshning menbesi hüseyinning bir nechche kün awwal twittirda hembehirligen xitay hökümitining Uyghur musulmanlirigha tutuwatqan mu'amilisi heqqidiki maqalisige jaw lijiyenning bergen inkasidin bolghan.

“Maliye téz xewerliri” gézitining 16-öktebirdiki munasiwetlik xewiride déyilishiche, 62 yashliq hüseyin xaqqani nechche kün awwal özining twittirigha “London waqti” géziti élan qilghan “Xitay Uyghur musulmanlirini choshqa göshi yéyishke mejburlawatidu” namliq maqalisini hembehirligen. Jaw lijiyen bu maqalige inkas qayturushning ornigha xaqqanini eyibligen. U mundaq dégen: “Heqiqeten yumurluq bir ish. Wijdani we dölet teweliki yoq bir adem junggogha asassiz hujum qilishqa ötüptu. Bek epsus!”

Jaw lijiyenning bu xil eyiblishige qarita xaqqani diplomatik qa'ide yosunni chüshendürüp, diplomatlar özi mulazimet qiliwatqan döletning xelqige we öz dölitige bolghan wetenperwerlik idiyesige hujum qilishigha bolmaydighanliqini tekitligen.

Xaqqani 15-öktebir, yeni düshenbe küni PTI namliq téléwiziye programmisigha söz qilip, mundaq dégen: “Men jaw lijiyenning xitayni we xitayning siyasetlirini qoghdashtiki heq-hoquqini hörmet qilimen. Emma uning pakistan'gha wekillik qilip turup méning ismimni atap eyiblesh qilmishi heqiqeten bir ‛nomussizliq‚.”

U yene mundaq dégen: “Men peqet ‛london waqti‚ géziti élan qilghan Uyghurlarning choshqa göshi yéyishke mejburliniwatqanliqi heqqidiki maqalini so'al belgisi bilen qoshup chiqirip qoydum. Bu xewer yéqindin béri bashqa nurghun gézitlerdimu élan qilindi. Jaw lijiyen méni mushu ish seweblik dölet teweliki we wijdani yoq dep eyiblidi.”

Jaw lijiyen xaqqanining bu sözlirige qarita özining uni ezeldin pakistanning sabiq elchisi dep hörmet qilip kelgenliki, buningdin kéyin undaq qilmaydighanliqini bildürgen.