Awstraliye géziti xitayning Uyghur ichki ezalirini qarangghu bazarda sétiwatqanliqini xewer qilghan

Muxbirimiz erkin
2021.11.01
Share on WhatsApp
Share on WhatsApp

Awstraliyening mélborin shehiride chiqidighan “Quyash xewerchisi” géziti xitayning Uyghurlarning ichki ezalirini qarangghu bazarda sétiwatqanliqini xewer qilghan. “Hindistan waqti” géziti, mélborindiki “Quyash xewerchisi” gézitining yéqinda Uyghurlar uchrawatqan xorlashlargha da'ir bir doklat élan qilip, qorqunchluq tepsilatlarni ashkarilighanliqini bildürgen. Xewerde éytilishiche, bu doklatta Uyghurlargha a'it bolghan “Bir saghlam jigerning qandaq qilip qarangghu bazarda 160 ming dollargha sétilghanliqi, xitayning bu sodidin yiligha az dégende bir milyard dollar kirim qilidighanliqi” tepsiliy yézilghan iken.

Bu, xitayning tunji qétim lagérdiki Uyghurlarning ichki ezalirini sétip, ichki eza etkeschiliki qilish bilen eyiblinishi emes. Bu yil 6-ayda b d t kishilik hoquq mutexessislirimu xitayning Uyghur ichki ezalirini sétiwatqanliqigha a'it ishenchlik doklatlardin qattiq endishige chüshkenlikini élan qilghan. Mutexessisler étnik, til we diniy az sanliq tutqunlargha qarita mejburiy qan tekshürüsh élip bérilghanliqi, “Ultra awaz” üskünisi we réntgén'gha chüshürülgenliki, tekshürüsh netijisining ichki eza köchürüsh sanliq melumat ambirigha yüklen'genlikini bildürgen.

“Hindistan waqti” gézitining éytishiche, “Quyash xewerchisi” ning doklatida xitayning ichki eza köchürüsh doxturxanilirining lagérlardin anche yiraq jayda emesliki, doxturxanilardiki opératsiye qétim sani we bimarlarning ichki eza saqlash waqtining qisqiliqi uzun waqittin buyan keng kölemlik “Ichki eza ‍etkeschiliki” yüz bériwatqanliqini körsitip bériwatqanliqi tekitlen'geniken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.