Хитайниң уйғур мәһбуслириниң ичкий органлирини көпләп еливатқанлиқ еһтимали әндишә қозғимақта

Мухбиримиз җәвлан
2022.04.11
Share on WhatsApp
Share on WhatsApp

“йеңи әрәб” ториниң 10-апрел бәргән хәвиридин мәлум болушичә, хитай дохтурлири муһим ичкий органларни тирик бимарлардин кесип еливелип, уларниң өлүшини кәлтүрүп чиқиридикән. Хәвәрдә көрситилишичә, алдинқи һәптә елан қилинған бир илмий доклатта икки тәтқиқатчиниң бу һәқтә бәргән баяни нәқил кәлтүрүлгән болуп, бимар дейилгән у қурбанларниң көпинчисиниң уйғур тутқунлириға охшаш мәһбуслар болуш еһтимали юқири икән.

Австралийә дөләт университети сиясәт вә хәлқара мунасивәтләр доктори матив робертсон (Mathew Robertson) билән исраилийә әза көчүрүш илмий җәмийитиниң әзаси, профессор җакоб лави (Jacob Lavee) қатарлиқлар өпкә вә йүрәк әзалирини көчүрүш оператсийәгә аит 2800 парчә хитайчә мақалини тәһлил қилған болуп, һәйран қаларлиқ көп оператсийә мисаллириға асасән ички әзаларниң тирик адәмниң бәдинидин елинғанлиқини байқиған. Доклатида мундақ язған: “биз 71 парчә мақалидә байқиған испатлар шуни ениқ көрсәттики, улар әзаларни суғуруп елиштин илгири бимарларниң меңиси техи өлмигән. Наһайити рошәнки, бу оператсийәни қобул қилғучилар чоқум мәһбуслар”.

Бу доклатниң елан қилиниши уйғур районидики нәччә милйон лагер тутқунлири вә түрмә мәһбуслириниң халиған чағда орган тәминләшкә вә өлүшкә мәҗбур болидиғанлиқи һәққидики әндишини пәйда қилған. Игилинишичә, түрмә вә лагердики уйғурларниң биологийәлик учурлири хитайниң орган амбириға биваситә уланған болуп, қайси типтики орган тепилип қалса, шу инсан қурбанлиқ нишаниға айлинидикән.

Көзәткүчиләрниң қаришичә, хитай гәрчә 2014-йил тутқун қилинғанларниң бәдинидин орган елишни тохтатқанлиқини билдүргән болсиму, өлүмгә һөкүм қилинғучиларниң бәдинидин орган йиғивелишни давамлаштурған. Униңдин башқа, уйғурлардин тутқун қилинғанларниң органлирини йиғип, “һалал орган” содиси қилған, бу доклат хитайниң бу қанлиқ җинайәтни техиму кәң даиридә, техиму вәһший усулда давамлаштуруватқанлиқини көрситип беридикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.