Xitayning Uyghur mehbuslirining ichkiy organlirini köplep éliwatqanliq éhtimali endishe qozghimaqta

Muxbirimiz jewlan
2022.04.11
Share on WhatsApp
Share on WhatsApp

“Yéngi ereb” torining 10-aprél bergen xewiridin melum bolushiche, xitay doxturliri muhim ichkiy organlarni tirik bimarlardin késip éliwélip, ularning ölüshini keltürüp chiqiridiken. Xewerde körsitilishiche, aldinqi hepte élan qilin'ghan bir ilmiy doklatta ikki tetqiqatchining bu heqte bergen bayani neqil keltürülgen bolup, bimar déyilgen u qurbanlarning köpinchisining Uyghur tutqunlirigha oxshash mehbuslar bolush éhtimali yuqiri iken.

Awstraliye dölet uniwérsitéti siyaset we xelq'ara munasiwetler doktori matiw robértson (Mathew Robertson) bilen isra'iliye eza köchürüsh ilmiy jem'iyitining ezasi, proféssor jakob lawi (Jacob Lavee) qatarliqlar öpke we yürek ezalirini köchürüsh opératsiyege a'it 2800 parche xitayche maqalini tehlil qilghan bolup, heyran qalarliq köp opératsiye misallirigha asasen ichki ezalarning tirik ademning bedinidin élin'ghanliqini bayqighan. Doklatida mundaq yazghan: “Biz 71 parche maqalide bayqighan ispatlar shuni éniq körsettiki, ular ezalarni sughurup élishtin ilgiri bimarlarning méngisi téxi ölmigen. Nahayiti roshenki, bu opératsiyeni qobul qilghuchilar choqum mehbuslar”.

Bu doklatning élan qilinishi Uyghur rayonidiki nechche milyon lagér tutqunliri we türme mehbuslirining xalighan chaghda organ teminleshke we ölüshke mejbur bolidighanliqi heqqidiki endishini peyda qilghan. Igilinishiche, türme we lagérdiki Uyghurlarning bi'ologiyelik uchurliri xitayning organ ambirigha biwasite ulan'ghan bolup, qaysi tiptiki organ tépilip qalsa, shu insan qurbanliq nishanigha aylinidiken.

Közetküchilerning qarishiche, xitay gerche 2014-yil tutqun qilin'ghanlarning bedinidin organ élishni toxtatqanliqini bildürgen bolsimu, ölümge höküm qilin'ghuchilarning bedinidin organ yighiwélishni dawamlashturghan. Uningdin bashqa, Uyghurlardin tutqun qilin'ghanlarning organlirini yighip, “Halal organ” sodisi qilghan, bu doklat xitayning bu qanliq jinayetni téximu keng da'iride, téximu wehshiy usulda dawamlashturuwatqanliqini körsitip béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.