Ma shingrüy “Idiye we medeniyet teshwiqat xizmiti yighini” da chet'ellerge qaratqan teshwiqatni kücheytishni tekitligen

Xitay da'iriliri Uyghur élida atalmish “Jungxu'a milliti ortaq gewdisi éngi” ni omumlashturush we chet'ellerge qaritilghan teshwiqat herikitini yenimu kücheytishni tekitligen. Uyghur aptonom rayonluq partkomning sékrétari ma shingrüy 25-dékabir küni ürümchide “Idiye we medeniyet teshwiqat xizmiti yighini” chaqirip, yéngi yilda Uyghur élidiki idiye-teshwiqat, medeniyet xizmetlirini puxta ilgiri sürüsh heqqide körsetme bergen.

Xewerde déyilishiche, ma shingrüy chet ellerge qaritiliwatqan teshwiqat heriketlirini kücheytish heqqide mexsus toxtilip, “Shinjanggha munasiwetlik tashqiy teshwiqat we jama'et pikiri kürishide teshebbuskarliq bilen ish körüsh kérek. Téma orunlashturushini kücheytip, söz teshebbuskarliqini qolda tutup, alaqe yollirini kéngeytish kérek” dégenlerni tekitligen.

Xitay hökümiti 2017-yili Uyghur élida keng kölemlik tutqun we qamalni yolgha qoyup milyonlarche kishini lagérlargha qamighan. Uning rayonda yolgha qoyghan wehshiyliklirini amérika hökümiti we kanada, gollandiye, firansiye qatarliq döletler parlaméntliri “Irqiy qirghinchiliq” dep körsetken idi. Biraq, yéqinqi yillarda xitay da'iriliri chet ellerde özini aqlashni meqset qilghan teshwiqat heriketlirini körünerlik kücheytip, buninggha her xil amal-charilerni qolliniwatqanliqi melum. Ularning chet eldikilerni rayon'gha teklip qilip apirish we rayondiki bir qisim Uyghurlarning chet ellerge chiqishigha ruxset qilish, mana mushu usullarning biridur.

Derweqe, ma shingrüy yighindiki sözide “Teklip qilish” we “Sirtqa chiqish” dep nam bérilgen bu siyasetni ishench bilen yolgha qoyushni tekitlep “Rayon'gha ‛teklip qilish‚ we ‛sirtqa chiqirish‚ ni téximu kölemleshtürüp ijtima'iy muqimliq, uzun muddetlik tinchliq we tertip üchün yaxshi tashqiy muhit yaritishimiz lazim” dégen.

Chet ellerdiki Uyghur teshkilatliri we közetküchiler, xitay hökümitining bundaq pilanliq, meqsetlik “Échiwétish” we teshwiqat heriketlirining Uyghurlargha hélihem dawam qiliwatqan qirghinchiliqni yoshurush, xelq'ara jama'etning közini boyash rolini oynishidin endishe qilmaqta.