Хитай даирилири уйғур елиниң 2021-йиллиқ идийәви тәшвиқат хизмитини орунлаштурған

Мухбиримиз әркин
2021-01-25
Share

Америка һөкүмити хитайниң уйғурларни бастуруши "ирқий қирғинчилиқ" дәп елан қилған бир пәйттә, хитайниң уйғур елидики тәшвиқат органлири йиғин чақирип, өзлириниң 2021-йиллиқ идийәви тәшвиқат хизмитини орунлаштурған. "шинҗаң гезити" ниң хәвәр қилишичә, уйғур аптоном районлуқ тәшвиқат бөлүми 24-январ райондики һәр дәриҗилик тәшвиқат органлирини йиғинға чақирип, бу йиллиқ идийәви тәшвиқат хизмити ши җинпиңниң шинҗаңни башқуруш тоғрисидики "баш нишанни әмәлгә ашуруш үчүн күчлүк идийәви капаләт билән тәминләш" ни тәләп қилған.

Бу йиғин хитай һөкүмити американиң 19-январ уйғурларға ирқий қирғинчилиқ йүргүзиватқанлиқини елан қилишиға қарши кәң көләмлик һуҗум башлиған, һуҗумниң нишани американиң сабиқ ташқий ишлар министири майк помпейоға қаритилған бир вақитта ечилған. "шинҗаң гезити" ниң хәвиридә билдүрүшичә, 24-январдики йиғинда райондики һәр дәриҗилик тәшвиқат органлириниң "тематик тәшвиқатни гәвдиләндүрүп, шинҗаң мәдәнийәт өзләштүрүш қурулушини чоңқурлаштуруш, җоңхуа миллити ортақ идийәсини турғузуш…шинҗаңниң көп тәрәплимилик образини намайән қилиш" ни тәләп қилған.

Хитяйниң уйғурларни бастурушини америка һөкүмитиниң "ирқий қирғинчилиқ" дәп елан қилиши хитайни қаттиқ биарам қилған иди. Көзәткүчиләрниң тәкитлишичә, бу йиғин уйғурларға ирқий қирғинчилиқ елип барғанлиқини инкар қиливатқан хитайниң, америкаға қарши тәшвиқатни техиму күчәйтидиғанлиқидин дерәк беридикән. Һалбуки, уйғур кишилик һоқуқ тәшкилатлири хитайниң "шинҗаң мәдәнийәт өзләштүрүш қурулуши", "җоңхуа миллити ортақ идийәси" ниң уйғур мәдәнийәт қирғинчилиқиға ул салғанлиқини тәкитләп кәлди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт