Xitay da'iriliri Uyghur élining 2021-yilliq idiyewi teshwiqat xizmitini orunlashturghan

Amérika hökümiti xitayning Uyghurlarni basturushi “Irqiy qirghinchiliq” dep élan qilghan bir peytte, xitayning Uyghur élidiki teshwiqat organliri yighin chaqirip, özlirining 2021-yilliq idiyewi teshwiqat xizmitini orunlashturghan. “Shinjang géziti” ning xewer qilishiche, Uyghur aptonom rayonluq teshwiqat bölümi 24-yanwar rayondiki her derijilik teshwiqat organlirini yighin'gha chaqirip, bu yilliq idiyewi teshwiqat xizmiti shi jinpingning shinjangni bashqurush toghrisidiki “Bash nishanni emelge ashurush üchün küchlük idiyewi kapalet bilen teminlesh” ni telep qilghan.

Bu yighin xitay hökümiti amérikaning 19-yanwar Uyghurlargha irqiy qirghinchiliq yürgüziwatqanliqini élan qilishigha qarshi keng kölemlik hujum bashlighan, hujumning nishani amérikaning sabiq tashqiy ishlar ministiri mayk pompéyogha qaritilghan bir waqitta échilghan. “Shinjang géziti” ning xewiride bildürüshiche, 24-yanwardiki yighinda rayondiki her derijilik teshwiqat organlirining “Tématik teshwiqatni gewdilendürüp, shinjang medeniyet özleshtürüsh qurulushini chongqurlashturush, jongxu'a milliti ortaq idiyesini turghuzush…shinjangning köp tereplimilik obrazini namayen qilish” ni telep qilghan.

Xityayning Uyghurlarni basturushini amérika hökümitining “Irqiy qirghinchiliq” dep élan qilishi xitayni qattiq bi'aram qilghan idi. Közetküchilerning tekitlishiche, bu yighin Uyghurlargha irqiy qirghinchiliq élip barghanliqini inkar qiliwatqan xitayning, amérikagha qarshi teshwiqatni téximu kücheytidighanliqidin dérek béridiken. Halbuki, Uyghur kishilik hoquq teshkilatliri xitayning “Shinjang medeniyet özleshtürüsh qurulushi”, “Jongxu'a milliti ortaq idiyesi” ning Uyghur medeniyet qirghinchiliqigha ul salghanliqini tekitlep keldi.