Amérikada puqralarning ijtima'iy alaqe cheklimisi 30-aprélgha qeder uzartildi

Muxbirimiz eziz
2020-03-30
Élxet
Pikir
Share
Print

Amérika prézidénti donald tramp amérikaning korona wirusigha taqabil turush tedbirliride ijtima'iy alaqe cheklimisining 30-aprélgha qeder uzartilghanliqini élan qildi.

Prézidént trampning 29-mart aqsarayda chaqirghan axbarat yighinida tekitlishiche, amérikada korona wirusi yuqumi seweblik "Eng köp ölüm-yitim kelgüsi 2 hepte ichide yüz bérishi mumkin" iken. U ijtima'iy alaqe cheklimisi kishilerning "Ghelibe qilish yoli" ikenlikini tekitlep: "Amérikadiki yuqum ehwali 6-aygha qeder yaxshilinidu," dégen.

Xitayning wuxen shehiride partlighan korona wirusi amérikagha tarqilip, nöwette 140 mingdin artuq kishining yuqumlinishini keltürüp chiqardi. Xitayning wirusqa da'ir alaqidar uchurlarni yoshurup, uning dunyawi yuqumgha aylinishigha yol échishi amerika-xitay arisida qattiq sürkilish peyda qilghan. Nöwette amérika hökümiti xitaygha qaratqan tenqidini bir az yumshatqan bolsimu, lékin bezi mutexessisler xitayning yuqumni suyi'istémal qilishigha yol qoymasliqni telep qilmaqta.

27-Mart küni amérikadiki "Tashqi siyaset kéngishi" ning tetqiqatchisi maykél sobolik "Dölet teqrizi" zhurnilida maqale élan qilip, xitayning korona wirusini öz paydisigha ishlitishige yol qoyulmasliqi kéreklikini tekitligen. Uning körsitishiche, "Xitay kompartiyesi tajsiman wirusning yuqumida hem ot qoyghuchi hem ot öchürgüchi rolini oynimaqta" iken. U bu otni xitay kompartiyesining qoyghanliqi, lékin hazir uning qutquzghuchi qiyapetke kiriwalghanliqi, lékin "Amérikaliqlar choqum birliship, kompartiyening qutratquluq qilghuchi ikenlikini éytishi kérekliki" ni bildürgen.

Toluq bet