Ikki xitay puqrasi pakistanda oq tégip yarilandi

11-Ayning 5-küni, ikki xitay puqrasi pakistanning karachi shehiride oq tégip yarilan'ghan. “Roytérs agéntliqi” ning bu heqte bergen xewiride déyilishiche, bu weqe karachi shehiri soda merkizidiki bir kiyim-kéchek zawutining yénida yüz bergen.  Oq zawutning ichidin étilghan bolup, oq atquchining bir qarawul ikenliki éniqlan'ghan. Emma u téxi tutulmighachqa, oq étish sewebimu éniq emesken. Yarilan'ghan xitay puqralirining ehwalimu ashkarilanmighan.  

Ilgirimu pakistanda ishlewatqan xitay ishchiliri we xitay oqutquchilirining hujumgha uchrap ölgenliki xewer qilin'ghanidi. 2024-Yil 10-ayda karachi ayrodurumining yénida partlash yüz bergen bolup, ikki xitay inzhénéri ölgen, “Baluchistan azadliq teshkilati” özlirining  bu weqege mes'ul ikenlikini jakarlighanidi.

Xitay puqralirining pakistanda hujumgha uchrash weqelirining üzülmey yüz bérishi xitayning dawamliq béshini aghritidighan mesilige aylan'ghan. Pakistan tashqi ishlar ministirliqi xitay puqralirini qet'iy qoghdaydighanliqi heqqide qayta-qayta wedilerni bergen bolsimu, bundaq weqelerning yüz bérishining aldini alalmighan. Buning tüp sewebi, pakistanning ichki qismidiki dawalghush we malimanchiliq iken. 

Xewerde éytilishiche, pakistanning gherbiy jenubidiki baluchistan ölkisi 10 yildin buyan pakistan hökümiti we armiyesi bilen qarshiliship kelgen bolup, pakistanning xitaydin alidighan menpe'etlirige tehdit sélip kelgen. Baluchistan qoralliq küchliri öz rayonidiki tebi'iy bayliqlardin téximu köp menpe'et élishni, öz tewelikidiki “Xitay-pakistan iqtisadiy karidori” ning eng muhim qurulush türi bolghan gwadar portidin ünümlük paydilinishni telep qilip kelgen. Ularning bu heqtiki arzu-telepliri orunlanmighanliqi üchün izchil her xil usullar bilen pakistan hökümiti we xitay puqralirigha hujum qilishni dawam qilip kelgen.