Пәйзиваттики бир әмәлдар: “‛икки йүзлимичи‚ ләр ‛үч хил күч‚ ләрдинму хәтәрлик”

Уйғур аптоном районидики даириләр бу йил киргәндин буян аталмиш “үч хил күчләр” гә қарши қәсәмнамә яки “очуқ хәт” елан қилип, өзлириниң хитай дөлити вә компартийәсигә болған садақитини билдүрүп келиватқан иди.

Бүгүн “тәңритағ тори” да елан қилинған бир қәсәмнамидә тәнқид нишани аталмиш “үч хил күч” тин көпрәк “икки йүзлимичи” ләргә мәркәзләшкән.

“‛үч хил күч‚ вә ‛икки йүзлимичи‚ ләргә қарши қәтий күрәш қилимән” мавзулуқ бу қәсәмнамида мундақ дейилгән: “зораван террорчиларға селиштурғанда ‛икки йүзлимичи‚ ләр техиму һелигәр, техиму қаранийәт. Уларниң зийини техиму узун муддәтлик вә техиму еғир”.

Бу қәсәмнамә пәйзиват наһийәлик ислаһатқа рәһбәрлик қилиш гурупписиниң муавин мудир дәриҗилик әзаси турғун йүсүп тәрипидин йезилған. Хотән даирилири йеқинда “икки йүзлимичи” ләрни паш қилидиған йип училири билән тәминлигүчиләрни 500 миң йүән билән 1 милйон йүән арилиқида мукапатлайдиғанлиқи һәққидә уқтуруш тарқатқан иди.

Муһаҗирәттики уйғур көзәткүчиләр, бу хил уқтуруш вә баянатлардики бу пәрқләр вә “йепиқ тәрбийәләш мәркәзлири” ниң техичә тақалмаслиқидәк реаллиққа асасән буниңдин кейин уйғур кадирларниң бир мәһәл йәниму еғир зәрбә бериш нишани болуш еһтималлиқини пәрәз қилишмақта. Норвегийәдики сиясий көзәткүчи зумрәт ханим, өткән һәптә радийомизға қилған сөзидә уйғур аптоном районидики қаттиқ зәрбә долқуниниң пәйдин -пәй уйғур җәмийитиниң әмәлдарлар қатлимиға йүзләнгәнликини илгири сүргән иди.