Mehbusluq hayatining beshinchi yilida ilham toxtini shertsiz qoyuwétish telepliri yangridi

Muxbirimiz eziz
2019-01-15
Élxet
Pikir
Share
Print

Uyghurlarning heq we hoquqliri üchün söz qilghanliqi seweblik "Bölgünchilik" jinayiti bilen eyiblinip ömürlük qamaq jazasigha höküm qilin'ghan Uyghur ziyaliysi ilham toxti qolgha élin'ghanning beshinchi yilida xelq'ara jama'et xitay hökümitige xitab qilip, uni shertsiz qoyuwétishke chaqirdi.

Ilham toxti 2014-yili 15-yanwarda qolgha élinip, shu yili séntebirde muddetsiz qamaq jazasigha höküm qilin'ghan idi. Uning qolgha élin'ghanliqigha besh yil tolghanda xelq'ara kechürüm teshkilati, xelq'ara qelemkeshler jem'iyiti, erkin tibet, ilham toxti guruppisi qatarliq orunlar birleshme chaqiriq élan qilip, ilham toxti bilen birlikte téxiche qamaqta turuwatqan sansizlighan Uyghur ziyaliylirini qoyuwétishni telep qildi.

Birleshme bayanatta ilham toxtining qolgha élinishtin tartip sotlinishqiche bolghan jeryanda qanuniy tertiplerning toluq ijra bolmighanliqi, uni ürümchi sheherlik 1-türmige qamalghandin kéyinmu uning a'ile tawabi'atliri bilen körüshüshige qattiq cheklime qoyuluwatqanliqi, hetta ilham toxtining bu yil 25 yashqa kirgen jiyeni uning resimini we erkin asiya radiyosida élan qilin'ghan ilham toxti heqqidiki ikki parche maqalini yan téléfonida saqlap qoyghanliqi üchün on yilliq qamaq jazasigha höküm qilin'ghanliqi, ilham toxtining "Uyghurbiz" torigha hemdemleshken yette oqughuchiningmu "Bölgünchilik" bilen eyiblinip qamaqqa élin'ghanliqi bir-birlep eslep ötülidu.

Birleshme bayanatta yene xitay hökümitining ilham toxtini qamaqqa höküm qilish arqiliq keng Uyghur ziyaliylirigha we pa'aliyetchilirige "Agah bolush" ni uqturghanliqi alahide tekitlinidu. Shundaqla hazir Uyghurlar diyarida berpa bolghan ghayet zor sandiki lagérlargha qamalghan milyonlighan bigunah Uyghurlar arisida yüzligen dangliq Uyghur ziyaliylirining barliqi éytilip, bu xil qanunsiz tutqun qilmishini tézdin ayaghlashturush chaqiriqi otturigha qoyulidu.

Toluq bet