Türmidiki Uyghur ziyaliysi ilham toxtining a'ilisidikiler uni bu hepte axiri ziyaret qilidiken

Muxbirimiz irade
2016.02.17

Türmide yétiwatqan Uyghur ziyaliysi ilham toxtining a'ile tawabi'atliri uni bu hepte axiri ziyaret qilidiken. Ilham toxtining ayali güzelnurning radi'omizgha bildürüshiche, ilham toxtining ikkinchi akisi 18-féwral küni ürümchige yétip kélidiken we hepte axirida ilham toxtini ziyaret qilidiken.

Ilham toxti 2014-yili 9-ayda “Döletni parchilashqa urunush” jinayiti bilen eyiblinip muddetsiz qamaq jazasigha höküm qilin'ghandin buyan jaza mudditini ürümchi 1-türmiside ötewatqan idi. Uning her 3 ayda bir qétim a'ilisi bilen körüshüshige ruxset qilinidighan bolup, bu nöwetliki 3-qétimliqi bolup hésablinidiken. Güzelnurning éytishiche, ilham toxti türmide yalghuz kishilik kamérda turidiken, emgekke sélinmaydiken, adette kitab oqushighimu ruxset qilinidiken. Biraq, da'irilerning uning a'ile-tawabi'atliri yaki uni ziyaret qilmaqchi bolghanlar bilen körüshüshige qoyghan cheklimisi éghir bolup, 3 ayda bir qétim aran 30 minut körüshüshkila ruxset qilidiken.

Buningdin sirt, ilham toxtining jinayiti békitilgendin buyan eslide uning ikki balisigha bériliwatqan 2000 som turmush yardem pulimu toxtitiwétilgen bolup, bir a'ile kishiliri peqet güzelnurning 3500 som ayliq ma'ashighila tayinip qalghan. Güzelnur bu ikki oghlining normal a'ililerning baliliridek chong bolalmaywatqanliqini, iqtisad seweblik ularni derstin sirtqi kurslarghimu ewetelmeywatqanliqini bildürdi.

Béyjingdiki tonulghan kishilik hoquq aktipi xu jya yéqinda ilham toxtining ikki balisini yoqlap kelgen bolup, u radi'omizgha qilghan sözide “Biz hemmimiz bu a'ilige yardem qolimizni sunushimiz kérek. Bu ikki balining biri yeslide, yene biri bashlan'ghuchning 3-yilliqida oquydu. Ilham toxtining eng köngül bölidighinimu balilarning bixeterlikidin qalsila, ularning yaxshi terbiye élishi idi” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.