Ilham toxti guruppisining mes'uli eniwerjan xitay ziyaliylirining ilham toxtini qollighanliqigha rehmet éytti

Bu yil etiyaz mezgilide gérmaniyede qurulghan ilham toxti guruppisining mes'uli enwerjan ependi, radiyomiz xitay bölümi muxbirining ziyaritini qobul qilip, bir qisim xitay ziyaliyliri we pa'aliyetchilerning ilham toxtini 2016-yilliq saxarof mukapatigha tewsiye qilghanliqigha rehmitini bildürdi.

Ilham toxti guruppisi ilham toxtini 2016-yilliq saxarof erkinlik mukapati namzatliqigha körsetken bolup, ilham toxtini saxarof erkinlik mukapatigha körsitishke chet'ellerde we xitay ichide tonulghan xu jya, wang lishyung, yang jyenli we bashqa bir qisim xitay ziyaliyliri, démokratik zatliri, yazghuchiliri, muxbirliri hem xelq'ara kishilik hoquq pa'aliyetchiliri aktip awaz qoshqan.

Eniwerjan ependi sözide, téximu köp xitay ziyaliylirini ilham toxti mesilisige köngül bölüshke chaqirdi. “Xitaydiki özgirish tori”ning sahibi, amérikida yashaydighan xitay ziyaliysi saw yashüe xanim we amérika indi'ana uniwérsitétining tibet ishliri mutexessisi, proféssor éllot spréling ependi, firansiyelik xitayshunas mari xolzman, eniwerjan we bashqilar bulturdin bashlap ilham toxtini mezkur mukapatqa körsitish teyyarliq xizmitini bashliwetken idi.

Xewerdin melum bolushiche, dunya Uyghur qurultiyi bayanatchisi dilshat rishitmu xitay ziyaliylirining ilham toxti we xelq'araliq ilham toxti guruppisining pa'aliyetlirige bolghan qollashlirini qarshi alidighanliqi hem rehmitini bildürgen.

Ilham toxti tutqun qilin'ghandin buyan amérika qelemkeshler jem'iyitining “Barbara goldsimis erkinlik mukapati”, türkiye yazghuchilar jem'iyitining “Türk erkinlik mukapati” qatarliq mukapatlargha érishken, 2016-yili ilham toxti ependi yene martén annal mukapatigha namzat qilip körsitilgen idi.