Xelq'ara kechürüm teshkilati: “Xitay jezmen adaletsizlikke xatime bérishi kérek!”

Xitay türmisidiki Uyghur ziyaliysi ilham toxtining qamaqqa höküm qilin'ghanliqining on yilliqida xelq'ara kechürüm teshkilati 23-iyul bayanat élan qilip “Xitay hökümiti on yilliq adaletsizlikke jezmen xatime bérishi kérek” dep körsetti.

Bayanatta ilham toxtigha artilghan “Jinayetler” ning pütünley yéziqchiliq we oqutquchiliq jeryanida otturigha qoyulghan pikirler ikenliki, bu xil qamaqning emeliyette Uyghurlar duch kéliwatqan sistémiliq basturushning janliq inkasi ikenliki tekitlen'gen. Shuningdek ilham toxtigha oxshash tinchliqni teshebbus qilghuchining qamaqqa höküm qilinishi emeliyette xitaydiki basturushning qanchilik derijige yétip barghanliqini körsitidighanliqi eskertilgen.

Bayanatqa qoshumche teriqiside xitay re'isi shi jinpinggha yollashqa bolidighan teyyar tékist bérilgen bolup, herqandaq kishi özining xususiy élxet adrési arqiliq ewetishke bolidiken. Xette ilham toxtigha artilghan “Bölgünchilik jinayiti” ning pütünley asassiz töhmet ikenliki, ilham toxtigha artilghan “Pikir jinayiti” ning qanuniy asasi yoqluqi, shunga uni shertsiz qoyup bérish kérekliki éytilghan.

Ilham toxti 2014-yili 23-séntebirde ömürlük qamaq jazasigha höküm qilin'ghan bolup, sotning adil bolmighanliqi we ashkara ötküzülmigenliki köp tereplime uchurlardin melum bolghan idi.