Gérmaniye kishilik hoquq teshkilati: gérmaniye-xitay kishilik hoquq di'alogida ilham toxti mesilisi muzakire qilinishi kérek

Gérmaniye xeter astidiki xelqler teshkilati gérmaniye-xitay kishilik hoquq di'alogi bashlinish harpisida bayanat élan qilip, di'alogta ilham toxti délosi qatarliq konkrét mesililerning muzakire qilinishini telep qildi.

Mezkur teshkilatning asiya ishliri mes'uli ulrix déli'us, burun ötküzülgen di'aloglarning héchqandaq ünümi we ijabiy tesiri bolmighanliqini bildürüp, shunga, bu nöwetlik di'alogta choqum konkrét mesililer muzakire qilinishi kérek, dep qaraydighanliqini bildürdi.

Gérmaniye-xitay kishilik hoquq di'alogi 7 ‏-we 8 ‏-noyabir künliri ötküzülidu. Bu di'alog 1999‏-yili sabiq gérmaniye bash ministiri shrédöt zamanida bashlan'ghan. Emma di'alogning ehmiyiti we ünümi kishilik hoquq teshkilatlirining izchil tenqidige uchrap kelgen. Ularning qarishiche, di'alog héchqandaq emeliy mesile hel qilmaydighan resmiyet xaraktérlik söhbetke aylinip qalghan idi.

Ulrix dél'i'us peyshenbe küni radi'omizgha bergen bayanatida, “Nöwette xitaydiki eng éghir mesililerning biri, diniy guruhlar we az sanliq milletlerni meyli ular xristi'an, falun'gung, musulman, buddist bolsun yaki tibet, Uyghur, mongghul we xitay bolsun, ularni kontrol qilish, cheklesh we basturushtur. Shunga diniy étiqad we milletler mesilisini nuqtiliq orun'gha qoyushni telep qilimiz” dégen.