Lyuksimborgtiki xitay elchixanisidin misirdiki tutqunda ghayib qilin'ghan ilyasjan raxman sürüshte qilindi

Muxbirimiz irade
2020-02-05
Share

Xelq'ara kechürüm teshkilati misirdiki tutqundin kéyin ghayip bolghan Uyghur yash ilyasjan raxman üchün heriketke ötti.

4-Féwral küni mezkur organning lyuksimborg shöbisi ezaliri xitayning shu yerde turushluq elchixanisi aldida namayish qilish we imza qoyush herikiti uyushturush arqiliq ilyasjan raxmanning aqiwitini sürüshte qilghan. 

Lyuksémbérgning "Kronikol" namliq gézitining xewirige qarighanda, xelq'ara kechürüm teshkilati lyuksimborg shöbisi namayish küni xitay hökümitidin ilyasjan raxmanni qoyuwétishni telep qilghan. Ular aldinqi heptila ilyasjan raxman üchün imza qoyush herikiti bashlighan bolup, heriketke 900 din artuq kishi awaz qoshqan iken. 4-Féwraldiki namayish küni shöbe bashliqi natali boltin xitay elchixanisigha ilyasjanni qoyuwétish heqqide mektub tapshurghan. 

Élyasjan raxman 2017-yili iyunda misirda oquwatqanda tuyuqsiz tutqun qilinip, xitaygha qayturulghan we lagérgha qamalghanliqi texmin qiliniwatqan 200 din artuq ghayib Uyghur oqughuchining biri. Shu chaghda uning ayali ularning ikkinchi balisigha éghir'ayagh idi. Élyasjanning ayali méhrinisa abdughéni ikki balisi bilen türkiyede panahlanmaqta. 

2017-Yili 7-ayning béshida misirda yüz bergen Uyghur oqughuchilarning tuyuqsiz tutqun qilish weqeside ghayib bolghan Uyghur oqughuchilarning qeyerde tutup turuwatqanliqi, xitaygha qayturulghanlarning aqiwiti we teqdirige alaqidar mesililer hélihem aydinglashmidi. 

Xelq'ara kechürüm teshkilati xitay hökümitini Uyghur élidiki lagérlarni taqashqa we lagér tutqunlirining aqiwiti heqqide melumat bérip, ularning a'ililiri bilen körüshtürüshke chaqirip kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet