Imran xanning xitay hökümitining siyasitini muhemmed peyghemberning yoligha tengleshtürüshi, keskin tenqidke uchridi

Muxbirimiz eziz
2022-03-30
Share

Taliban hakimiyitining eng chong arqa tiriki, dep qariliwatqan pakistanning bash ministiri imran xan yéqinda islam'abad shehride chaqirilghan “Islam hemkarliqi teshkilati” ning 48-nöwetlik tashqiy ishlar ministirliri mejlisidin kéyin, alahide söz qilghan hemde xitay hökümi'itni ajayip zoq bilen medhiyeligen. Hindistanda chiqidighan “Jumhuriyet géziti” ning 27-marttiki xewiride éytilishiche, imran xan yighin ehlige ziyapet bérip: “Xitay hökümi'iti muhemmed peyghemberning teshebbuslirigha emel qilip ötken ottuz yil mabeynide 700 milyon kishini namratliqtin qutuldurdi” dégen. Emma xitay hökümitining islam dinini “Xitaychilashturush” namida qandaq depsende qiliwatqanliqi, Uyghurlarning diniy étiqadini yoqitish üchün ularni ramizanda choshqa göshi yéyishke mejburlawatqanliqi heqqide bir éghizmu söz qilmighan.

Melum bolushiche, xelq'ara axbarat wastiliri pakistan hökümitining Uyghurlar mesilisige qandaq qaraydighanliqi heqqide imran xanni birnechche qétim ziyaret qilghan. Imran xan deslep özining bu ishlardin xewersiz ikenlikini bildürgen bolsa, kéyinche “Uyghur qirghinchiliqi” ning esla mewjut emeslikini tilgha alghan. Emdilikte bolsa Uyghurlardiki barliq islamiy örp-adetlerning hemmisini térorluqqa baghlap Uyghurlarni basturiwatqan hemde islam dinigha ashkara jeng élan qilghan xitay hökümitini “Muhemmed peyghemberning yoligha egeshti” dep ashkara maxtighan.

Halbuki, xitay hökümitining az dégendimu bir milyondin üch milyon'ghiche Uyghurni lagérlargha qamap bolghanliqini alahide eskertken “Jumhuriyet géziti” bu hadisini tenqidlep: “Uyghurlarni milyonlap lagérgha qamighan xitay hökümitining tashqiy ishlar ministiri wang yimu bu qétimliq yighin'gha ishtirak qildi. Emma islam elliri hazirghiche xitayning Uyghurlarni lagérlargha qamishi toghrisida söz qilip baqmidi.” dégen.

Imran xanning bu sözliri élan qilin'ghandin kéyin, her sahening keskin tenqidige duch keldi. Bolupmu imran xanning Uyghur diyaridiki islam dinigha baghlan'ghan qirghinchiliqqa süküt qilishtin halqip, hélihem qirghinchiliqni dawam qilduriwatqan xitay hökümitini yüzturane maxtishini beziler “Bu ashkara munapiqliq” dédi.

Sabiq afghanistan prézidénti xemid karzayining prézidéntliq ishxana mudiri, nébraska uniwérsitéti “Afghanistan tetqiqat merkizi” ning diréktori shérjan ehmedzayi bu heqtiki ziyaritimiz jeryanida “Imran xanning musulmanlarni qirghin qiliwatqan xitay hökümitini muhemmed peyghemberge tengleshtürgenliki sépi özidin munapiqliq. Bu xil tengleshtürüshni otturigha qoyghan herqandaq kishi shundaq lenetlinidu,” dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet