Imran xan térorluq bilen eyiblinish aldida turmaqta

Pakistanning sabiq bash ministiri imran xan yéqinda “Térorluq we aghdurmichiliq” bilen eyiblinip qolgha élinish aldida turmaqta iken. Nöwette bu weqe herqaysi axbarat wastilirining diqqet merkizide bolup qalghan.

“Washin'gton pochtisi” gézitining 22-awghusttiki xewiride éytilishiche, 2021-yili aprélda aghdurup tashlan'ghan imran xan özining milyonlarche egeshküchilirini hökümetke qarshi namayish qilishqa qutratqanliqi hemde pakistandiki armiyeni tenqidleshke bolmasliq endizisini buzup tashlap, armiyege haqaret qilghanliqi seweblik qolgha élinish qismitige duch kelmekte iken. Nöwette uning hémayichiliri imran xanning turalghusini qatmu-qat oriwalghan halda saqchilarning qolgha élishigha qarshiliq körsetmekte iken.

Xewerde éytilishiche, imran xan 20-awghusttiki namayishta pakistanning bash saqchi emeldarini we bash sotchisini eyiblep: “Biz silerni kechürmeymiz. Eksiche silerni sotqa bérimiz” dégen. Pakistan saqchi da'iriliri uning bu sözlirini “Térorluq we aghdurmichiliq” qa jorup “Imran xan bundaq déyish arqiliq xelqni zorawanliqqa, qanunsizliqqa we isyan'gha qutratmaqta” dégen.

“Aksyos” (Axios) torining 23-awghusttiki maqaliside körsitilishiche, imran xanning eng yéqin heqemsayiliridin bolghan shahbaz gil (Shahbaz Gill) izchil özlirining egeshküchilirini armiyege qarshi chiqishqa qutritip kelmekte iken. Emma köp qisim kishiler imran xanning hakimiyet béshigha chiqishida armiyening achquchluq rol oynighanliqini tekitlep kelmekte iken. Imran xan bolsa köp qétim héchqandaq delil-ispat bolmighan ehwalda “Méning rusiye we xitay bilen dostane alaqe ornitishim tüpeylidin amérika hökümiti süyiqest pilanlap méni aghduriwetken” dégen iken.

Melum bolushiche, nöwette imran xan'gha artilghan eyibleshler put tirep qalsa uning qolgha élinip sotqa élip chiqilishi resmiy halda bashlinidiken. Birleshma agéntliqning bu heqtiki xewiride “Nawada imran xan'gha qarshi eyibleshler sotta étirap qilinsa u birnechche yil qamaqta yatidu” déyilidu.