Talibanlarning afghanistanni kontrol qilishi imran xanni xursen qilmaqta

• Muxbirimiz eziz
  2021-08-17

Taliban küchliri nechche yilliq éghir zerbidin halsirap “Emdi héchqandaq tehdit bolalmaydu” dep qarilishqa bashlighanda, ularning bir yumulapla afghanistanning igisi bolup qélishi nurghun kishilerni ganggiritip qoyghan. Halbuki, “Wol-strét zhurnili” gézitining 17-awghusttiki tehrirat maqalisi buningda pakistan rehbiri imran xanning muhim “Töhpisi” barliqini tekitligen. 

Maqalide éytilishiche, imran xan talibanlarning hakimiyet béshigha chiqishi heqqide söz qilip: “Afghan xelqi emdi qulluqning asaritidin xalas boldi,” dégen. Shuningdek u pakistanda én'gliz tilidiki ma'arip mu'esseselirining köplep qurulushini “Medeniyet kontrolluqi” dep tenqidligen. 

Maqalide körsitilishiche, afghanistanning jenubiy qismidiki rayonlar taliban küchlirining mewjut bolushi we yéqinda herbiy jehette üstünlük qazinishida muhim rol oynighan. Bu jaylar bilen tutash bolghan pakistan téritoriyesimu talibanlarning “Jennet” liridin biri bolghan. On yilning aldida osama bin ladénmu del pakistandiki mushu jaygha yoshurun'ghan. Emdilikte bolsa amérika hökümitige qarshi bolghan imran xan bashquriwatqan pakistanning birnechche kün ilgiri talibanlarning kabulgha bésip kirishide achquchluq rol oynighanliqi, amérika hökümitining ilgiriki waqitlarda pakistan bilen bolghan munasiwitining ejellik xataliq bolghanliqi barghanséri ashkar bolushqa bashlighan.

Siyasiy obzorchi waltér méd bu heqte toxtilip: “Amérika hökümitining afghanistanda ghelibe qilishidiki eng zor tosalghu emeliyette biz eyni waqitta ‛ittipaqdash‚ dep qarighan pakistanning taliban küchlirini toxtawsiz qollap quwwetlishi boldi,” dégen. Buningdin ilgiri imran xan köp qéimlap özining Uyghurlar mesiliside xitay hökümitini eyiblimeydighanliqini, chünki pakistan'gha her jehettin yardem bériwatqan xitay hökümitining ular üchün eng qedinas dost ikenlikini tekitligen idi.