"Irqiy qirghinchiliq" qarari jow baydin hökümitining küchlük tedbir qollinishigha türtke bolushi mumkin

Muxbirimiz irade
2021-01-21
Share

Amérika tramp hökümiti wezipidin ayrilishtin bir kün burun xitayning Uyghurlargha qaratqan zulumini "Irqiy qirghinchiliq" dep békitkendin kéyin nöwettiki jow baydin hökümitining bu heqte némilerni qilidighanliqi diqqet nuqtisi bolmaqta.

"Jenubiy xitay seher pochtisi" gézitining bu heqtiki xewiride éytilishiche, közetküchiler bu qarar jow baydin hökümitining Uyghur élidiki zulumgha qarshi turush üchün küchlük tedbir qollinishigha türtke bolidu, dep qaraydiken. Bolupmu ular jow baydin hökümitining xitaygha munasiwetlik mesililerde shérik döletler bilen keng kölemde hemkarlishishi mumkinlikini éytqan.

Amérikadiki miras fondining yuqiri derijilik siyaset analizchisi oliwiya énos yuqiridiki gézitke qilghan sözide "Baydén hökümiti bu qarar boyiche emeliy heriketke ötüp, zulumgha chétishliq téximu köp shexs we orunlargha jaza tedbiri élan qilishi, Uyghurlarning panahlinish mesilisini muhim mesile qilip békitishi we mejburiy emgekke qarshi küresh qilishi mumkin" dégen.

Énos xanim yene "Xitaymu qiliwatqan heriketlirining soraqsiz qalmaydighanliqini tonup yetti", dégen.

Amérikadiki kolorado uniwérsitéti asiya tetqiqat merkizining tetqiqatchisi darrén baylir "Jenubiy xitay seher pochtisi" gézitige qilghan sözide "Irqiy qirghinchiliq dep belgilesh, chet'ellerdiki shirketlerni uning rayondiki teminlesh zenjirliri bilen bolghan munasiwitini üzüshke mejburlishi, 2022-yilliq qishliq olimpik musabiqisini xitaydin yötkesh chaqiriqlirini kücheytishi we chet'ellerde Uyghurlarning panahlinish ishlirini asanlashturushi mumkin" dégen. U hazir demalliqqa buning Uyghur éli ichidiki Uyghurlargha qandaq tesir körsitidighanliqini mölcherleshning qéyinliqini ipadilesh bilen birge, kanada we en'gliye qatarliq döletlerningmu bu zulumni irqiy qirghinchiliq dep tonushi mumkinlikini bildürgen.

"Nyu-york waqti" gézitide élan qilin'ghan bu heqtiki maqalidimu jow baydin hökümitining Uyghurlar uchrawatqan irqiy qirghinchiliqqa qarshi turush üchün xelq'araliq hemkarliqni qolgha keltürüsh yolida köprek heriket qilishi mumkinliki bildürülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet