Analizchilar: “Irqiy qirghinchiliq shek-shübhisiz irqiy qirghinchiliqtur”

Muxbirimiz jewlan
2021.01.26

19-Yanwar, amérika tashqi ishlar ministirliqining sabiq ministiri mayk pompéyo xitayning Uyghurlargha qaratqan zulumini “Irqiy qirghinchiliq”, “Insaniyetke qarshi jinayet” dep atighandin kéyin, siyasiy analizchilar her qaysi axbarat sehipiliride köpligen maqale-obzurlarni élan qildi.

26-Noyabir “Zimistan” torida “Mayk pompéyodin antoni bilinkin'ghiche: irqiy qirghinchiliq déginimiz irqiy qirghinchiliqtur” namliq bir maqale élan qilin'ghan bolup, “˃Menmu xitayning bu jinayitini irqiy qirghinchiliq dep qaraymen˂ dégen yéngi tashqi ishlar ministiri namzati antoni bilinkinning bu meydani, amérikaning özgirishini ümid qilghan xitayning ümidini yoqqa chiqardi” dégen nuqta yorutup bérilgen.

Maqalide éytilishiche, xitay hökümiti mayk pompéyogha chish-tirniqighiche öch bolup ketken we uni haqaretleshtin toxtimighan. Emma antoni bilinkénmu oylimighan yerdin ularning ghezipini qozghighan we ümidsizlendürgen. Shundaqtimu xitay hökümiti baydin hökümitining yenila yumshap qélishini we mayk pompéyoning siyasitini dawamlashturmasliqini ümid qilidiken. Shuning bilen bir waqitta, xitay hökümiti gherb elliridiki bir qisim döletlerni yénigha tartip, “˃Irqiy qirghinchiliq˂ dégen bu atalghu chektin éship ketti, sabiq prézidént donald trampmu bu atalghuni ishletmigen, mayk pompéyo wezipidin ayrilish aldida baydin hökümitige qiyinchiliq tughdurup bérish üchün bu sözni ishletti” dégen teshwiqatni yürgüzüshke bashlighan.

Analizchilarning qarishiche, mayk pompéyo xitayning jinayitini bahalash üchün mexsus guruppa uyushturghan bolup, aldirapla bu hökümni chiqarghan emes. Xitay hökümitining Uyghur ayallirini mejburiy tughmas qiliwétishi, qorsaqtiki balini mejburiy chüshürüwétishi, perzentlirini ata-anisidin ayriwétishi we Uyghur qizlirini xitaygha tégishke mejburlishining özila bu milletni yoqitish jinayitini ispatlap béridu. Bular shek-shübhisiz irqiy qirghinchiliqtur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.